Partia Socialiste dhe Partia Demokratike pritet të hedhin këtë të enjte piketat e bashkëpunimit të tyre, për shkak se do të votojnë për 3 vakancat në Autoritetin e Medias Audiovizive.
Komisioni për Mediat ka zgjedhur ditën e djeshme 6 emrat për kandidatë për plotësimin e 3 vendeve vakante në AMA, ndërkohë që gazeta ka mësuar detaje nga mbledhja e djeshme e Komisionit të Mediave, të zhvilluar me dyer të mbyllura. Kështu në këtë mbledhje, deputetët e komisionit vendosë t’i japin bekim për 6 emrat kandidatë të Autoritetit të Medias Audiovizive, nga të cilët 3 prej tyre do të zgjidhen në seancën e Kuvendit ditën e enjte ku dhe do të votohen.
Konkretisht Komisioni i medias zgjodhi dje Aurela Bicja, Gjergj Hamiti e Joana Allushi që janë propozuar nga mazhoranca, ndërsa Jetmir Halilaj, Besjan Zogaj e Desada Metaj që mbështeten nga opozita.
Besion Ajazi, deputet i Partisë Socialiste dhe anëtarë i komisionit, i tha BIRN se për 6 kandidatët pati dakordësi mes palëve.
Ajazi tha se procedura e ndjekur ishte ajo e eliminimit, kur opozita dhe socialistët patën të drejtë të eliminonin kandidatë, deri sa u mbërrit në listën me 6 veta që do i kalojnë kuvendit për votim. Të njëjtin qëndrim mbajti edhe deputetja e Partisë Demokratike Ina Zhupa.
“Vijuam sipas procedurave ligjore duke eliminuar një herë ata një, një herë ne një, derisa ngelen 6 kandidaturat që do i kalojmë në seancë”, tha Zhupa. AMA aktualisht ka 4 anëtarë nga 7 që ka gjithsej bordi i saj, që janë kryetarja Armela Krasniqi, zëvendëskryetar Sami Nezaj,
Gledis Gjipali dhe Suela Musta. Vakancat janë krijuar nga shkarkimi i Zylyftar Bregut në 2019, mbarimit të mandatit të Piro Mishës dhe dorëheqjes së Agron Gjekmarkajt si anëtar bordi i AMA-s, i cili u zgjodh deputet i Partisë Demokratike në qarkun e Lezhës, që pritet të plotësohen me votimin ditën e enjte.
Pra me zgjedhjen e vakancave të AMA, mazhoranca i hap rrugë bashkëpunimit me demokratët, i cili pritet të vijojë edhe me zgjedhjen e Guvernatorit të ri të Bankës së Shqipërisë, duke qenë se është Gent Sejko, i cili gëzon mbështetjen e PD-PS.
