Zjarret masive në lindje të Washingtonit kanë detyruar evakuimin e rreth 60 mijë banorëve në zonën e Spokane, ndërsa të paktën 600 shtëpi, biznese dhe struktura të tjera janë shkatërruar nga flakët.
Zjarret në dhe përreth Spokane, qyteti i dytë më i madh i shtetit, dogjën rreth 21 kilometra katrorë gjatë fundjavës. Ato janë pjesë e dhjetëra vatrave të zjarrit që kanë përfshirë zona të ndryshme të Shteteve të Bashkuara perëndimore.
Në të gjithë Washingtonin janë djegur rreth 1 mijë kilometra katrorë, ndërsa disa prej zjarreve, përfshirë ato në zonën e Spokane, vijojnë të jenë jashtë kontrollit.
Zyrtarët e zjarrfikësve dhe të zbatimit të ligjit kanë bërë të ditur se deri tani nuk ka raportime për persona të lënduar apo të zhdukur. Megjithatë, autoritetet kanë paralajmëruar se situata mbetet e rrezikshme dhe se përpjekjet për përballimin e zjarreve janë ende në fazat e para.
Pamjet nga zona e Spokane tregojnë ndërtesa të përfshira nga flakët, re të mëdha tymi pranë zonave të banuara dhe shtëpi të shkatërruara që vijojnë të nxjerrin tym.
Autoritetet kanë shprehur shqetësim edhe për kushtet atmosferike, pasi parashikohet që moti i thatë të vazhdojë në ditët e ardhshme.
“Nuk jemi jashtë rrezikut”, deklaroi senatorja Maria Cantwell gjatë një konference për shtyp në Spokane, ku morën pjesë zyrtarë federalë, shtetërorë dhe lokalë.
Ndërkohë, hetuesit vijojnë të punojnë për të përcaktuar shkakun e shpërthimit të zjarreve.
Situata është e rënduar edhe në shtete të tjera të SHBA-së. Në Idahon perëndimore dhe Oregonin lindor, ekipet e emergjencës kanë vijuar për të dhjetën ditë radhazi luftën kundër një zjarri që ka djegur rreth 1,360 kilometra katrorë kullota.
Zjarri kërcënon më shumë se 600 shtëpi dhe rreth 800 struktura të tjera në një zonë ku aktiviteti kryesor ekonomik lidhet me fermat e bagëtive.
Ndërkohë, në Utahun qendror, një tjetër zjarr masiv u rrit ndjeshëm gjatë fundjavës, duke kaluar nga rreth 41 në 145 kilometra katrorë. Sipas autoriteteve lokale, më shumë se 100 bagëti kanë ngordhur si pasojë e zjarrit.
