Një debat i ri politik është ndezur ditët e fundit, por këtë herë midis ish-kryeministrit Sali Berisha dhe Presidentit të Kosovës, Hashim Thaçi. Pas bisedimeve mes Serbisë dhe Kosovës për ndryshim kufijsh, Sali Berisha u shpreh i shqetësuar se midis dy vendeve po kryhet tregti për të shitur territorin e Kosovës. Pavarësisht se Thaçi sqaroi se nuk bëhet fjalë për t’i falur diçka Serbisë, por thjesht për të rifituar Preshevën, sërish akuzat vijuan. Gjatë replikave në distancë, Presidenti kosovar i kujtoi Berishës lidhjet me Millosheviç.
Por si qëndron e vërteta e këtyre lidhjeve? Ish-kryetari i Shërbimit Informativ të Shtetit, Fatos Klosi hodhi dje dritë mbi këtë çështje, duke treguar sesi mund të jetë e vërteta e thyerjes së embargos së naftës. Gjatë një prononcimi për gazetën “SOT”, Klosi deklaroi se bëmat e Berishës në këtë çështje tregojnë se ai ka lidhje me Millosheviç. “Unë nuk mund të them sepse Berisha këto lidhje, edhe nëse ka patur, i ka bërë në mënyrë të kujdesshme.
Por, duke marrë të gjitha sjelljet e tij, qoftë kjo që po diskutohet sot, thyerja e embargos për Jugosllavinë tregon që ka lidhje. Shiko e ka thënë edhe Bullatoviç, një nga personazhet më kryesorë të asaj kohe. D.m.th bëmat e Berishës tregojnë që ai ka pasur lidhje. Mesa duket ky ka gisht sepse ky ka përfituar nga kjo punë”, tha ai. Sipas tij, nëse vëzhgohen deklaratat apo veprimet e ish-kryeministrit, arrin në përfundimin e lartpërmendur.
“Për sa kohë veprimet e Berishës, sidomos kjo puna me Embargon, kanë qenë në favor të Jugosllavisë në atë kohë. Është e qartë që Berisha nuk e ka bërë ashtu siç e kam dëgjuar edhe unë që “e çoi naftën në Jugosllavi që të mos kishin ftohtë kosovarët dhe të ngroheshin gjatë dimrit”. Broçkull çdo gjë. Po të mos e kisha dëgjuar këtë shprehje unë, do ta kisha harruar vërtetë që Berisha është prononcuar”, u shpreh Fatos Klosi.
Reagimi i Ngjelës
Avokati Spartak Ngjela reagoi dje sa i takon situatës së krijuar në marrëdhëniet Serbi-Kosovë për shkëmbim territoresh apo rivendosje kufijsh si edhe për rolin e politikës shqiptare në ruajtjen e territoreve shqiptare. Përmes një postimi në rrjetet sociale, ai deklaroi se ish-kryeministri Sali Berisha gjithmonë ka kërkuar që të shesë interesat e shqiptarëve tek vendet armike, mes të cilave përmendi Moskën, Serbinë dhe Athinën.
Sipas tij, Presidenti i Serbisë, Aleksandër Vuçiç ndryshon nga politikanët tanë në këtë aspekt. “Sigurisht që ai nuk është si politikanët shqiptarë, të cilët në100 vjet kanë shitur interesin kombëtar në Beograd, deri te këta tre të korruptuarit e mëdhenj të kësaj kohe – Berisha, Rama dhe Meta – të cilët gjithë shpresën për të shpëtuar nga ndëshkimi antikorrupsion e kanë në Moskë, në Beograd dhe në Athinë”, deklaroi Spartak Ngjela.
Sipas tij, Vuçiç në deklaratën e tij të fundit për mediat pranoi se Kosova tashmë është një shtet i pavarur dhe shteti serb nuk mund të bëjë asgjë. Spartak Ngjela nënvizoi më tej se sot dy armiqtë më të mëdhenj të vendit tonë, Serbia dhe Greqia, po luftojnë kundër SHBA sepse kjo e fundit është e vendosur të bëjë drejtësi për shqiptarët. “Të dy krahët, uzurpatorë dhe armiqësorë me shqiptarët: grekët dhe serbët, sot duken të tulatur, pa forcë dhe me një mllef kundër Amerikës. Pse? Sepse në aleancë me shqiptarët, Amerika po kërkon të rivendosë në drejtësi padrejtësitë çnjerëzore që u janë bërë shqiptarëve nga Turqia, Serbia, Greqia dhe Rusia. Dhe gjithçka ka nisur me pavarësinë e Kosovës. Po, ku ka realisht Serbi dhe Greqi?!”, u shpreh ai./Mimoza IBRA
