Nga Alteo Hysi
Ngjarja e rëndë në Kavajë, është një nga ato ngjarje që i ka lënë të gjithë pa fjalë jo vetëm për traumën që ka pësuar një 13 vjeçare, por edhe më shumë se kaq, për mënyrën çnjerëzore me të cilën është trajtuar publikisht fati i së miturës.
Viktimë e abuzimit seksual në një qytet të vogël, ku të gjithë e njohin njëri tjetrin, si të mos i mjaftonte i gjithë presioni i një rrethi vicioz gjykimesh, vajza e mitur në gjithë këto ditë është ritraumatizuar, është ridhunuar, në mënyrën më barbare të mundshme, publikisht dhe mediatikisht nga ata që me jetën e saj po bëjnë politikë.
Pa respektuar as të drejtën për privatësinë, as ligjin për mbrojtjen dhe ruajtjen e privatësisë së viktimës, eksponentët e partisë demokratike, duket se kanë gjetur te rasti i vajzës ushqimin e përditshëm politik, pa kursyer asnjë detaj nga trauma që iu desh të kalojë.
Të gjithë treguesit në sjelljen e opozitës provojnë se nuk i intereson fati i së miturës por vetëm ta bëjnë copash jetën e saj për qëllime politike. Në një kohë kur vajzës i është dhënë mbështetja psikologjike dhe sociale nga strukturat e posaçme, mënyra më e mirë për ta ndihmuar të tjerët jashtë kësaj historie, është të mos e shfrytëzojnë atë për qëllimet e veta.
Në çdo vend të botës, ku ka politikanë të përgjegjshëm, raste të tilla i lihen në dorë për t’u trajtuar strukturave të posacme që me ekspertizën e tyre mund ta mbështesin viktimën, por ndërsa e mitura e Kavajës është trajtuar në kohë nga strukturat shtetërore, njerëzit e politikës, në mënyrë sa absurde aq edhe çnjerëzore, po bëjnë politikë me fatin e saj.
Rimediatizimi i tejskajshëm, sajimi i çdo lloj historie mbi vajzën nga politika, duke e kthyer atë në qendër të një debati politik të ulët dhe vulgar, është ridhunim i vajzës. E mitura nuk ka nevojë as për deklaratat false, keqardhjen, mëshirën apo viktimizimin që i bëjnë zonjat e PD. Vajza ka nevojë të rifitojë jetën e vet dhe për këtë arsye, politika duhet të ndalë së u marri me jetën e saj.
