Opozita ka zhvilluar dje protestën e 10 të saj, e cila si rrallë herë ka kaluar pa asnjë incident. Paralajmërimet e zv/ndihmës Sekretarit Amerikan të Shtetit Matthew Palmer dhe atë ambasadës së SHBA se do ketë pasoja nëse ka dhunë, Monika Kryemadhi dhe Lulzim Basha i kanë kthyer në qengja. Turma u grumbullua para Kryeministrisë rreth orës 20.00, ndërsa në 20.30 kryedemokrati Basha u ngjit në podium për të folur para të pranishmëve. Por protesta e djeshme ishte tepër e qetet. Nuk pati fishekzjarrë, kapsolle dhe për më tepër flakadanë apo bomba molotov.
Para Kryeministrisë të gjithë të pranishmit ishin mjaft të qetë, ndërkohë që nuk pati asnjë përplasje me policinë. Pasi mbaroi fjalën, Basha kërkoi nga turma që protesta të zhvendosej te Parlamenti, i cili për opozitën është simbol i krimit. Edhe aty situata ishte mjaft e qetë. Tubimi para hyrjes së Parlamentit zgjati rreth 5 minuta dhe më pas militantë u zhvendosën në selinë e PD ku në orën 22.00 protesta u mbyll. Gazeta e paralajmëroi pak ditë më parë se ka një ndarje në PD. Mbështetësit e Berishës duan kaos dhe dhunë, por Basha nuk e mbështet diçka të tillë, kjo dhe për shkak të ultimatumit të ndërkombëtarëve. Protesta e djeshme tregoi qartë se amerikanët i kanë tmerruar krerët e opozitës. Po ashtu, Basha tregoi dhe një herë se ka filluar të distancohet nga Sali Berisha. Ky i fundit edhe dje, por dhe më parë, ka bërë thirrje për revolucion. Madje dhe në takimet që Basha ka pasur me strukturat, mbështetësit e Berishës dhe kryebashkiakët kanë kërkuar që të ashpërsohet aksioni. Por Basha nuk i ka pranuar kërkesat e tyre, duke treguar se po zbaton ultimatumin amerikan dhe po del kundër Berishës. Reagimi i Matthew Palmer para 30 qershorit ishte më i forti i bërë ndonjëherë nga SHBA vitet e fundit dhe ai ishte i prerë si për incidentet në zgjedhje, ashtu dhe për protestat. SHBA ja ka bërë të qartë Bashës dhe Kryemadhit se nëse ka dhunë dhe revolta, PD e LSI do të shpallen organizata të dhunshme. Si duket kjo ka frenuar liderët e opozitës.
Tërheqja e Kryemadhit
Disa javë më parë Monika Kryemadhi ishte në të njëjtën linjë me Berishën. Ajo bënte thirrje për mosbindje civile dhe revolta. Por dy javë para zgjedhjeve dhe dje ka pasur një tërheqje totale. Edhe dje ajo tha se nuk do ketë dhunë, ndërsa me vete kishte dhe një fëmijë. Pra kemi një tërheqje totale të saj edhe pse presidenti Meta po vepron ndryshe. “Protestat nuk do të mbarojnë deri sa të mbyllet kjo vuajtje e jashtëzakonshme. Problemi nuk është te metodat, vjen te mënyra në të cilën është organizuar struktura kriminale e Ramës. Me procesin farsë mori goditjen ballore, dhe ndërkohë kemi një varfëri të jashtëzakonshme, një largim në masë të të rinjve. Janë protesta të shqiptarëve, protestat janë për të zgjidhur përfundimisht tranzicionin. Nuk ka bërë vaki që ky reagim qytetar i Shqipërisë, këtë reagim kaq të madh Shqipëria e ka patur vetëm në vitet ’90 kur u ngritën kundër regjimit”, tha Kryemadhi. Ajo komentoi edhe votimin në Parlament për ngritjen e komisionit hetimor parlamentar për presidentin Meta. “Është një Parlament që vjen si rezultat i parave të krimit. Sot shqiptarët nuk kanë hallin e karriges së Metës, të gjithë thërrasin se duan punë, taksa të ulëta, BE, me këtë qeveri Shqipëria nuk do jetë kurrë në BE, Rama po e çon vendin drejt një izolimi total. Kapja e reformës në drejtësi, e ekonomisë shqiptare për ta kthyer në lavatriçe të parave te pista e drogës, dhe këtë se thotë opozita por ndërkombëtarët”, vijoi më tej Kryemadhi. Sa i takon protestës së sotme Kryemadhi u shpreh se ajo do të jetë paqësore, ashtu si të gjitha protestat e opozitës, ndërsa theksoi se, çdo provokim i Lleshajt me shokë, kanë dështuar. /Kliti Topalli
