Efektivi që plagosi të shumëkërkuarin Orges Bilbili tregoi sesi ndodhi episodi mesditën e sotme në zonën e Xhamllikut. “Më drejtoi një herë armën…hidhe armën, ndal”, janë fjalët me të cilët polici iu drejtua të arrestuarit, që kërkohej për disa ngjarje kriminale, vrasje dhe atentate në Lushnje.
Pas bisedës me efektivin që u cilësua hero për mënyrën sesi përballoi situatën, ministri i Brendshëm Sandër Lleshaj vizitoi në spital qytetaren M.P. e cila u plagos gabimisht, pasi ndodhej në vendngjarje në momentin kur ndodhi incidenti. “Nuk e mora vesh cfarë ishte”, u shpreh e reja.
“Erdha të jap këtë tufë lule që kjo ditë të mos kalojë si ditë e keqe kujtese, të gjithë kujdesin e mjekëve e ke këtu. E ka thënë Zoti që ka kaluar me kaq dhe uroj ta kalosh shpejt”, i tha ministri.
Ndërsa një prej drejtuesve të policisë u shpreh se vajza shpëtoi jetën e një tjetri që e ka shtyrë.
“Një kombinim rrethanash solli, që gjatë një përplasje të rrezikshme mes Policisë së Shtetit dhe një personi me shumë rekorde kriminale, ku u përdorën armët e zjarrit, të arrihej të neutralizohej në gjendje të plagosur dhe të arrestohej një ndër personat më të kërkuar në vend.
Fatkeqësisht gjatë përplasjes mbeti e plagosur një kalimtare e rastit. Punonjësit e skuadrës “Shqiponja”, të cilët sot dëshmuan ato cilësi që të gjithë kërkojmë tek Policia jonë: zgjuarsi, vigjilence, përgjegjësi, profesionalizëm dhe trimëri. Pavarësisht pandemisë, Policia nuk e humbet fokusin tek detyrat e saj bazë”, tha Lleshaj.