Përfshirja në një koalicion me Partinë Demokratike dhe afrimi i zgjedhjeve parlamentare të 25 prillit, duket se kanë “zgjuar” nga gjumi letargjik kreun e Partisë për Drejtësi, Integrim dhe Unitet, Shpëtim Idrizi. Ky i fundit po i shfrytëzon këto ditë për të fituar politikisht dhe si kalë beteje po përdor çështjen çame.
Por përse zoti Idrizi u kujtua pikërisht në këto momente për çështjen çame? Gazeta ka bërë një analizë të gjithë rrugëtimit të Shpëtimit Idrizit në krye të PDIU dhe rezulton se ai ka korrur vetëm dështime dhe nuk ka arritur asnjë gjë të mirë në dobi të komunitetit dhe çështjes çame.
Kështu e para që vlen të vihet në dukje është fakti se zoti Idrizi kujtohet për çështjen çame vetëm sa herë ka zgjedhje, ndonëse kauza e Partisë për Drejtësi, Integrim dhe Unitet është mbrojtja e çështjes çame. Por në të vërtetë deri më tani kjo kauzë është mbrojtur vetëm në studio televizive dhe sa herë ka zgjedhje, pasi Idrizi dhe PDIU nuk kanë propozuar asnjë nismë, platformë a diçka tjetër që do i japë zgjidhje kësaj situate.
Madje, rasti më flagrant dhe që ka hyrë në histori si skandal është se Shpëtim Idrizi i propozoi Kuvendit të Shqipërisë që të miratonte një rezolutë në dhjetor 2012, përmes së cilës ndër të tjera njeh, mbështet dhe angazhohet për nevojën e restaurimit të të gjithë të drejtave të shqiptarëve çamë, dikur nënshtetas grekë, në përputhje me rrethanat e reja, sipas parimeve të legjislacionit ndërkombëtar.
Por një rezolutë e kësaj natyre ishte miratuar në Kuvendi i Shqipërisë në vitin 2004 dhe se rezultonte se ajo vetëm që nuk ishte botuar në Fletoren Zyrtare. Kështu që kjo lëvizje e Idrizit u pa nga të gjithë si mungesë respekti, pasi kreu i një partie që ka kryefjalë mbrojtjen e komuniteti dhe çështjen çame, as e kishte idenë se ka pasur tentativa për të çuar përpara këtë projekt. Kjo do të thotë se në vitin 2004 zoti Idrizi ka qenë drejtor dogane dhe se për të më shumë interesa ka pasur tepsia dhe timoni, se sa çështja çame.
Ja si Idrizi ka shkuar nga një koalicion në tjetrin
Por nuk ndalet me kaq pasi etja për pushtet dhe poste, duket se i kanë errur sytë kreut të Partisë për Drejtësi, Integrim dhe Unitet, Shpëtim Idrizi. Ky i fundit si kreu i PDIU ka braktisur kauzën dhe ka shkuar nga një koalicion në tjetrin vetëm për interes.
Në vitin 2015 zoti Idrizi braktisi koalicionin me Partinë Demokratike, duke u bashkuar me Partinë Socialiste dhe në këmbim mori disa poste në nivel zv/ministrash, drejtor drejtorish, nënkryetarin e Kuvendit, nën/kryetar bashkish, 3 Bashki dhe një duzinë këshilltarësh.
Edhe gjatë kësaj “martese” me PS-në, Idrizi ra në letargji, u kthye në “memec” dhe nuk e përmendi kurrë çështjen çame edhe pse logjikisht e kishte të lehtë duke qenë se ishte në bashkëqeverisje me Partinë Socialiste.
Ndërkohë që pas disa vitesh bashkëqeverisje me socialistët, kreu i Partisë për Drejtësi, Integrim dhe Unitet, Shpëtim Idrizi vendosi t’i braktiste ata për të shkuar në opozitë, ku dhe është pozicionuar së fundmi pranë Partisë Demokratike dhe në krah të “armikut” të tij, kreut të Partisë Bashkimi për të Drejtat e Njeriut, Vangjel Dule.
Kështu që duke parë këtë politikë të ndjekur nga Idrizi, shumë prej bashkëpunëtorëve dhe kontribuuesve më të mëdhenj të PDIU si zoti Abaz Hado, Tahir Muhedini apo edhe ish-deputeti Dashamir Tahiri, vendosën ta braktisin këtë parti në shenjë “hakmarrje”, duke e lënë kreun e PDIU të vetëm.
