Gazeta italiane “Corriere Della Sera” i ka kushtuar një artikull zgjedhjeve vendore në Shqipëri ku nënvizon se mes zgjedhësve të regjistruar janë edhe këngëtari italian Albano Karrizi dhe prezantuesi i njohur, Ezio Greggio. Sipas një hulumtimi të realizuar nga gazeta italiane të dyja fytyrat e njohura shfaqen në listat zyrtare të votuesve të Tiranës dhe Vlorës.
“Mes 3.5 milionë shqiptarëve që kanë të drejtën të votojnë të diel janë edhe Ezio Greggio dhe Al Bano Carrisi, pasi emrat e tyre figurojnë në bazën zyrtare të të dhënave. Vendi ballkanik do të zgjedhë 61 kryetarë të rinj dhe këshilltarë bashkiake në një raund zgjedhjesh të njohur nga qeveria e kryeministrit Edi Rama por jo nga presidenti i Republikës Ilir Meta”,shkruan “Corriere della Sera”. “Megjithë kaosin institucional dhe praninë e vetëm një kandidati në gjysmën e komunave, pas bojkotimit të opozitës, Greggio dhe Carrisi, ftohen të përmbushin detyrat e qytetarit të përgjegjshëm shqiptar. Prezantuesi dhe këngëtari me famë botërore janë italianë, por edhe qytetarë shqiptarë falë një dekreti presidencial. Greggio, u bë një shtetas shqiptar në janar të vitit 2015, ndërsa Carrisi, në qershor të vitit 2016. Kjo është arsyeja pse dy fytyrat e njohura italiane figurojnë në listat e votuesve shqiptar. Këngëtari i njohur mund të votojë në Tiranë,në një nga rrugët që të çon në sheshin Skënderbej. Ndërsa Al Bano, i cili figuron me vendbanim në Vlorë mund të shkojë të votojë në shkollën e mesme “Ataturk”, sqaron gazeta e njohur italiane.” “Corriere della Sera” shkon edhe më tej duke shkruar se nuk është çudi që të dy figurat e njohura italiane të figurojnë sikur kanë votuar. “Sipas informuarve, ata nuk duhet të jenë të vetëdijshëm se edhe mund të figurojnë sikur kanë votuar. Por nëse vendosnin të votonin realisht Greggio dhe Al Bano do të gjejnë veten në një klimë të nxehtë politike. Opozita, e cila akuzon qeverinë për lidhje me krimin e organizuar premton të mos lejojë mbajtjen e zgjedhjeve, duke bllokuar përdorimin e hapësirave publike.
Përgjatë ditëve të fundit, Shtetet e Bashkuara, OSBE-ja dhe ambasadat e vendeve më të rëndësishme europiane (përfshirë Italinë) kanë bërë thirrje për garantimin e procesit zgjedhor”, shkruan gazeta italiane. Po ashtu edhe rrejti televiziv britanik, “BBC News” i ka kushtuar një artikull zgjedhjeve lokale në vendit tonë, duke thënë se Shqipëria po mban një palë zgjedhje si asnjë tjetër që prej daljes nga komunizmi në 1990-tën. “Kryeministri Edi Rama u angazhua fort në fushatën elektorale për lokalet e së dielës, edhe pse kandidatët e tij socialistë nuk kanë thuajse asnjë lloj opozite në kutinë e votimit. Kjo vjen si rezultat i opozitës qendrore në vend, e cila i ka bojkotuar këto zgjedhje. Por në pasqyrimin e BBC-së përmendet dhe thirrja e drejtuar militantëve opozitare për të ruajtur qetësinë e shmangur dhunën që ka shoqëruar disa prej protestave të saj, që paraprinë procesin zgjedhor, me thirrjet për dorëheqjen e kreut të ekzekutivit e mbajtjen e zgjedhjeve të reja”, shkruan “BBC”. “Votimi po ecën përpara, me kritikët që as nuk i etiketojnë si zgjedhje duke marrë parasysh mungesën e konkurrencës. Disa kryebashkiakë lokalë të opozitës kanë përdorur kompetencat e tyre për të ndaluar përdorimin e ndërtesave publike, siç janë shkollat, si vendvotime. Mbështetësit e tyre janë përleshur me policinë dhe në disa raste i kanë vënë zjarrin fletëve e kutitë te votimit”, thekson gjiganti mediatik. Lulzim Basha, kreu i Partisë Demokratike më të madhe të opozitës, ka qenë nën presionin ndërkombëtar për të frenuar militantët, thekson BBC, duke nënvizuar sesi në prag të votimit, ai i kërkoi atyre të përmbahen nga dhuna.Nga ana tjetër “DW” thotë se vendi ynë përballet me situatë të paprecedentë! Dy data zgjedhjesh, heshtje zgjedhore si edhe mosbindje civile. Rreziku i akteve të dhunës është i pranishëm, prandaj policia po angazhohet maksimalisht. Për Al Xhaziren, vendi ynë i është drejtuar një palë zgjedhjeve përçarëse, megjithatë për rezultatin e tyre nuk ka asnjë dyshim, thotë ajo: opozita do të humbasë pushtetin në të gjitha njësitë administrative që kontrollon aktualisht.(Gazeta Si)
