Lulzim Basha nuk ndryshon asnjëherë në paraqitjen e tij të jashtme. Madje është gjithnjë në humor dhe shfaqet para kamerave i qeshur dhe i gëzuar.
Nuk ka asnjë shpupurisje flokësh, asnjë thinjë, asnjë rrudhë në fytyrë.
Sado erë e fortë të fryjë në takimet me bizneset apo kur shkon nëpër fshatra dhe takohet me fermerë e blektorë, Basha rrezaton qetësi.
Eshtë gjithnjë kreko, i kuruar deri në detaje dhe pa asnjë rrudhë në rrobat e tij.
Edhe kur shkon në takime të thjeshta, gjithçka duket për mrekulli. Sikur i ka të gjitha punët politike në vijë dhe shfaqet si të jetë ai autori i prosperitetit të vendit.
Herë herë bën dhe si kryeministër, duke dhënë porosi se si duhet të bëhet biznes, si duhet të mbillen zarzavatet, të lashtat e deri se si duhet mbarshtruar bagëtia. E imtë dhe e trashë.
Me të njejtin format paraqitet dhe në takimet me aleatët, ambasadorët dhe me gazetarët në daljet e tij publike. Gjithnjë i kuruar mirë, i qeshur dhe me humor.
Megjithëse opozita është jashtë parlamentit pas djegies së mandateve të deputetit vitin e kaluar. Po ashtu nuk ka asnjë pushtet në dorë opozita, sepse bojkotoi zgjedhjet vendore të 30 qershorit. Por Basha shfaqet në publik pa e prishur terezinë.
Është fakt se, pavarësisht një periudhe të gjatë në kye të PD në opozitë, ka mbushur gati shtatë vite që udhëheq këtë parti, Lulzim Bashën nuk e ka “vrarë” opozita.
Mund të themi se i ka ecur mbarë, pasi në çdo palë zgjedhje ka dalë i fituar. I ka humbur ato në realitet në 2015 për pushtetin vendor, më 2017 për pushtetin qëndror.
Ndërsa vitin e kaluar nuk hyri fare në zgjedhje. Pra në garën elektorale përballë kundërshtarit politik partia që ai drejton ka dalë me humbje të thellë, ndoshta e paprovuar në 30 vite për PD.
Por personalisht Lulzim Basha ka dalë i fituar.
Pse e themi këtë?
Faktet janë kokëfortë dhe nuk të lënë të gabosh. Në zgjedhjet e 25 qershorit 2017 përmes paktit me Edi Ramën mori mbi gjysmën e qeverisë.
Portofolet kryesore të kabinetit qeveritar dhe institucionet kryesore në vend ishin në dorën e tij.
Përmes ministrave teknikë. Të cilët sot janë në strukturat më të larta të PD, ose në krye të protestave apo sulmeve ndaj qeverisë së Ramës. Ata menjëherë filluan tenderat nëpër ministri.
Megjithatë Basha shënoi dhe “bingo” financiare, paçka se ishte në opozitë e humbi në zgjedhje.
Mori afër 14 milionë euro të pallatit të vjehrrit të ndërtuar në det në Vlorë. E kishte shembur IKMT pasi ishte ndërtim pa leje.
E bëri të veten këtë shumë. Ia përmendin dhe kundërshtarët brenda PD.
Por Basha e shoqëron marrjen e këtyre parave me publikimin e një liste të gjatë oligarkësh, të cilët sipas tij kanë futur duart në arkën e shtetit dhe shpërblehen nga qeveria.
Janë të njejtët biznesmenë që kanë marrë punë publike në qeverisjen e PD. Tani quhet oligarkë.
Të cilët nuk kanë lënë pa “gjë” as Kunatin e tij në këto ditë të vështira opozite. Ka dokumente dhe mazhoranca nuk “përton” t’ia kujtojë herë pas here!
Tani Basha kërkon të kthehet në sistem. U bë një Reformë Zgjedhore, vetëm për ta rikthyer PD dhe opozitën në institucione. Por Basha nuk ndalet. Dhe këtu kërkon përfitime financiare.
Rama deklaroi se tenderin për identifikimin biometrik ta bëjë zv.kryetari i KQZ, që do të jetë përfaqësues i opozitës.
Kaq u desh në disa mbledhje të Këshillit Politik radhazi vetëm me procedurën e përshpejtuar të këtij tenderi po merren. Aq sa është kthyer në barcaletë në Kuvend, media e ambientet politike.
Basha nuk tërhiqet. Tenderi është 15 milionë euro dhe sipas zërave, kompanitë afër Bashës, përfshirë dhe ato të Kunatit, kanë bërë gati procedurën për të “garantuar” indetifikimin biometrik.
Pra dhe në zgjedhjet parlamentare të radhës që mbahen vitin e ardhshëm Basha e ka të garantuar “mbështetjen” financiare. Këtu godet më shumë ekspertiza e opozitës, te tenderi.
Ndërsa kreu i opozitës i ka punët personale në vijë, opozita vetë vijon të shqetësohet për devijimin e kauzës së tyre në përfitimin e tenderit të identifikimit biometrik.
Dhe dje ai shërbeu si shkak për debatin e fortë në Kuvend, ku opozita e re ndjehet e zhgënjyer për degradimin e Reformës Zgjedhore në punë tenderash dhe jo në ndryshimin e sistemit zgjedhor dhe depolitizimin e komisioneve zgjedhore.
Por Bashës po i ecën në opozitë.
Ndoshta është një rast për t’u studiuar në analet e politikës botërore!/M.N