Publikohet plani për faljen e taksave për mbi 7 mijë automjete në vend. Ditën e djeshme përmes një postimi në rrjetin social Facebook kryeministri Edi Rama, njoftoi se, Drejtoria e Transportit Rrugor ka vendosur që të bëjë një lehtësim për sektorin e transportit rrugor që është goditur po ashtu nga koronavirusi.
Konkretisht ky institucion do të mbulojë 100% taksën vjetore të automjeteve të përdorura për gjithë vitin 2020, për plot 7204 mjete. “Ministria e Infrastrukturës dhe Energjisë, sjell një shembull të shkëlqyer solidariteti nga DPSHTRR për sektorin e transportit rrugor të pasagjerëve një rast i bukur ku një ent publik me vetëfinancim, nisur dhe nga rezultatet e mira për 2019 ofron, nga të ardhurat e veta të akumuluara, të mbulojë 100% taksën vjetore (TVMP), për gjithë vitin 2020, për 7,204 mjete”, shkruan Rama.
Ndër të tjera në këtë postim Rama sqaron se, Drejtoria e Transportit ka përcaktuar edhe kategoritë e automjeteve që përfitojnë nga mbulimi i kësaj takse për vitin 2020. Ndërsa për ata pronarë që i kanë paguar do të kompensohen në momentin e pagesës së TVMP pasardhëse, pra vitin tjetër.
“Nga kjo paketë solidare e DPSHTRR-së në vlerën 170,194,500 lekë përfitojnë 7,204 mjete të kategorisë: autobus (mbi 8+1), transport qytetës, transport rrethqytetës, transport ndërqytetës, shërbime të rastit (turistik brenda e jashtë vendit) ndërkombëtar të rregullt, transport për personele, transport për llogari të subjekteve brenda e jashtë vendit. Njoftojmë se ky akt mbështet njëkohësisht subjektet e lartpërmendura, buxhetin e shtetit dhe direkt bashkitë. Ndërkohë institucionet përgjegjëse do të mundësojnë që brenda majit kjo paketë të hyjë në fuqi. Ndërsa ata që i kanë paguar, do të kompensohen në momentin e pagesës së TVMP pasardhëse”, thekson kryeministri.
Reagon Shoqata e Transportit
Nga ana tjetër Shoqata e Transportit i ka kërkuar qeverisë që të shikojë lehtësira edhe në pika të tjera si, ulja e çmimit të naftës apo edhe përgjysmimi i kapaciteteve në automjete.
Në të kundërt ashtu sikur paralajmëruan edhe para dy ditësh, edhe këtë herë Kujtim Mema, kryetari i Shoqatës së Transportit të Udhëtarëve Ndërqytetës, tha se ata do detyrohen të rrisnin çmimin e biletës, pasi protokolli aktual po i çon drejt falimentimit. “Nuk na është njoftuar për rinisjen e punës, por kemi marrë vesh se jemi të fundit që do të fillojmë, pasi risku është më i madh. Këto nuk po i mendojmë ne, por ministria dhe ekspertët, që kanë thënë si fillim të rinisë puna me gjysmë kapaciteti dhe masat e sigurisë, maska dhe doreza. Por jemi të trembur, pasi nëse do të shkojmë me gjysmë kapaciteti, nuk na bën mirë të shkojmë në atë linjës, se shpenzimet janë të mëdha dhe nuk përballohen dhe do të jetë e mundur, që të bëhet vetëm me një rritje 30% të biletës për të përballuar një fitim minimal për ne që do të dalim në punë.
Me gjysmë kapaciteti transporti është drejt falimentimit”, tha ai. Teksa mori një shembull konkret në qytetin e Tiranës ai tha, se shtimi i një mjeku, rritja e çmimit të naftës dhe numri më i ulët i pasagjerëve duhet të jenë tre pikat që duhet të rishikojë qeveria për këtë sektor. “Një biletë Tiranë-Vlorë kushton 50 lekë të reja, një mjek me gjysmë kapaciteti i bie të ketë 100 mijë lekë të vjetra, është vetëm naftë nuk e di, nëse shteti do të na japë naftën më lirë dhe pagesë shoferi, këtu nuk ka pagesë për tatimet, fitimi, apo mirëmbajtjen e mjetit. Ne jemi skeptikë për punën se përpara kemi edhe muajt e verës, korriku dhe gushti me xhiro të dobët dhe lëvizje të vogla. Normaliteti mund të kthehet rreth 15-20 shtatorit, presim një vështirësi më të madhe tani. Do i kërkojmë bashkisë apo qeverisë që ta shikojë taksat dhe tatimet, të ketë një ulje, sepse kemi qenë të mundur edhe nga transporti informal”, shprehet ai.
