Një nga shtyllat e fushatës së krerëve të partive politike në vend është rregullimi i administratës shtetërore, si një element, sipas tyre, tejet i rëndësishëm në mbarëvajtjen e punëve të shtetit, që deri më sot ka ngelur pa adresuar. Shumë janë skeptikët që mund të mendojnë se ky është premtimi elektoral i radhës dhe se nuk ka gjë që nuk shkon me administratën tonë shtetërore. Mendoheni edhe njëherë.
Pasiviteti dhe apatia e administratës shtetërore përgjatë viteve elektorale nuk është një fenomen i padëgjuar në vendet në zhvillim, ku influenca e partive politike në administratë është edhe më e dukshme. Vitet e fundit, me lulëzimin e lëvizjeve politike popullore, në Evropë dhe më tej, është vënë re edhe një pasivitet i administratës së vendeve në zhvillim, së fundmi Francës, Austrisë, Anglisë, por edhe SHBA-ve.
Në vende të tilla të zhvilluara, ku administrata qëndrore luan rol primar në mbarëvajtjen e punëve të shtetit, është e vështirë të shohësh një gjendje pasigurie apo inaktivitet dhe mos të ketë reagime. Në vende më pak të zhvilluara, ku administrata qëndrore luan rol dytësor në vajtjen e punëve të shtetit, është e vështirë të shohësh një gjendje normaliteti apo aktiviteti; e cila së fundmi duket e pamundur.
Që prej vitit 2000, në Shqipëri ka pasur rotacion të pushtetit, pra kalimi nga partia e majtë tek partia e djathtë, mesatarisht çdo 8 vjet, pra çdo dy mandate. Nëse supozojmë se ky rotacion është shoqëruar me lëvizje të administratës, i cili në vetëvete është një fenomen real dhe jo supozim, por konteksti i ushtrimit na bën ta quajmë supozim, atëherë mbetemi me mandate gjysmake të punës së administratës.
Nga teoritë e manaxhimit dhe të burimeve njerëzore, në një organizatë mirëfunksionale i duhet një punonjësi rreth 1 vit të njohi natyrën e punës bazë dhe rreth 2 vjet të njohi edhe punën që ndodh “mbrapa kuintave”. Prandaj është e këshillueshme që lëvizjet në karrierë të bëhen jo më shpesh sesa cikli 3-4 vjeçar, që tregon se punonjësi ka pasur mundësinë të njihet me punën bazë, ka mësuar të përmbushi me sukses të gjithë detyrat e funksionit të fund të vitit të 2-të, është bërë ekspert i pozicionit të punës në vitin e 3-të dhe ka përmirësuar proceset e vetë pozicionit në vitin 4-ërt.
Duke aplikuar këto rregulla bazë në manadatet 8 vjeçare të administratave shtetërore shqiptare, do na rezultonte se punë reale këto administrata kanë kryer vetëm 6 vjet. Por teoria e mësipërme vlen për organizata me vazhdimësi pune, ku punonjësit nuk kanë detyrime të tjera veç kontratës së punës.
Kur bëhet fjalë për administratë shtetërore në vendin tonë, në një mënyrë apo tjetrën, cdo punonjës ka një detyrim politik ndaj atyre individëve apo partive që i kanë futur në punë; ose minimalisht duhet të shtiren sikur janë të angazhuar ta përmbushin këtë detyrim politik, duke filluar nga roja, pastruesja dhe deri tek titullari institucionit.
Për ta përmbledhur, për shkak të ndryshimit të individëve nga pozicionet e tyre, mandatet shkurtohen me dy vjet, nga 8 në 6. Për shkak të emërimeve politike, duke konsideruar që dy mandate qeverisëse kanë brenda 2 fushata zgjedhore, pa hezitim shumëzojmë me 0 punën 6 muaj para dhe 6 muaj pas zgjedhjeve, duke e sjell kështu periudhën kohore aktive në punë në 4 vjet. Pa llogaritur këtu periudhën inaktive prej 2 muajsh gjatë periudhës së verës, 1 muaj gjatë periudhës së dimrit dhe 1 muaj leje të zakonshme në vit, sipas kodit të punës.
Si përfundim, mund të themi pa hezitim, se në 16 vjet qeverisje të vendit, bërthama e shtetit ka punuar vetëm 6 vjet. Diferenca është përdor siç kanë ditë veç ato, partitë e vendit./Ekskluzive.al
