Afrimi i SPAK dhe vendosmëria e mazhorancës për ta shkarkuar nga detyra, duket se e kanë çorientuar presidentin Ilir Meta. Çdo ditë që kalon sulmet e tij ndaj qeverisë, reformës në drejtësi dhe veçanërisht ambasadave po shtohen. Por dje presidenti ka arritur kulmin, duke u shpallur luftë amerikanëve. Dje ambasada propozoi që të shkohet në Venecia për të marrë një opinion sa i takon ngërçit për në Kushtetuese.
Por zëdhënësi i Presidencës, Tedi Blushi, reagoi shumë ashpër kundër ambasadës. Ai arriti deri aty sa të akuzojë ambasadën si të përfshirë në trafiqe droge. Blushi u shpreh se “rruga e Elbasanit”, pra ambasada, të çon në Xibrakë. Por Xibraka nënkupton drogën. Vite më parë aty u zbulua laboratori i kokainës. “Garantët e veprimeve të paligjshme dhe mafioze të Dvoranit e kanë marrë mbrëmë përgjigjen zyrtare në një bisedë zyrtare tepër të përgjegjshme të Kryetarit të Shtetit. Tymi i Venecias që hodhi me porosi të Ramës, Ambasadori në ikje i Agaçit pak ditë më parë, është turpi më i fundit i grupit të strukturuar diplomatik në Tiranë, bashkëfajtor për dhunimin sistematik të reformës në drejtësi dhe me qëllim kapjen e saj të plotë nga regjimi monist i Edi Ramës. Mjaft më “Rule of Embassy”. Është koha për “Rule of Law” si çdo vend demokratik. Rruga e Elbasanit të çon në Elbasan dhe Rama e përdor dhe për në Xibrakë! Rruga e Kavajës të çon në Kavajë! Vetëm rruga e Kushtetutës na çon në Europën e Bashkuar”, tha Blushi.
Reagon Meta
Sikur mos të mjaftonte deklarata e zëdhënësit, ai që i hodhi më tej benzinë zjarrit ishte vetë presidenti Ilir Meta. Ky i fundit doli para gazetarëve duke sulmuar ashpër ambasadorët dhe veçanërisht ambasadën e SHBA. “Amerika është këtu (vendos dorën në zemër), nuk është as në rrugën e Elbasanit dhe as në Xibrakë dhe as në rrugën e Kavajës. Amerika është këtu, Europa është këtu”, tha Meta. më tej presidenti ka shpërthyer në sulme sa i takon propozimit të ambasadës për ta dërguar në Venecia çështjen e Kushtetueses. Por presidenti i cilësoi ambasadorët palaço.
“Hipokritët që duan të çojnë këto akte në Venecia, ata janë hipokritë, sepse duhet të çonin zgjedhjen e Arta Markut me 69 vota në kundërshtim me Venecian, tani duan të shpëtojnë Dvoranin, pasi ka pasur garanci edhe nga disa palaçove ndërkombëtarë për të përdhunuar të gjithë procesin e KED-së”, vijoi ai. Më tej Meta doli me një propozim të qartë. Edhe pse kishte folur kohët e fundit, dje deklaroi se do të propozojë referendum, ndërsa sulmoi sërish SHBA. “Ka vetëm një zgjidhje për Ramën dhe disa palaço ndërkombëtarë, referendumi. Edhe diplomatët të dalin me Ramën. Unë do të dal me të gjithë shqiptarët që duhet të rimarrin në dorë sovranitetin e vendit pasi nesër është dita kur populli shqiptar votoi me referendum Kushtetutën më të mirë pas kaosit në 1997 dhe që Edi Rama dhe disa palaço ndërkombëtarë edhe në 2008 edhe më vonë e minuan dhe duan ta përdhosin çdo ditë. Prandaj larg duart nga Gjykata Kushtetuese. Zgjidhja është referendumi për të vendosur”, përfundoi Meta. Pra kreu i shteti duket se ka arritur deri aty sa po u hap luftë amerikanëve. /Kliti Topalli