Kreu i grupit parlamentar të Partisë Socialiste, Taulant Balla deklaron se depolitizimi i komisioneve zgjedhore dhe administrimi i zgjedhjeve nga një trupë apartiake është thelbi i reformës zgjedhore. Gjatë një interviste televizive, Balla foli për marrëveshjen mes palëve që uli në tryezë mazhorancën e opozitën.
“Së pari duhet të kuptojmë që është për të ardhur keq që u humb pothuajse një vit kohë e vyer për të reflektuar opozita jashtë parlamentare sepse kjo mund të kishte ndodhur fare mirë dhe para 1 viti. Kam qenë në studion tuaj në dhjetor të vitit të 2018 kur kam thënë që qëndrimi i PS për reformën zgjedhore është që të gjithë rekomandimet e OSBE/ODIHR të përkthehen në amendamente të Kodit Zgjedhor. Madje që ishim të gatshëm që opozitës t’i jepnim një letër të bardhë. Për fat të mirë kemi ardhur sot në një kuadër të përmirësuar. Në vitin 2017 si rrallëherë kemi ngritur komisionin e posaçëm. Themeli i kësaj reforme është depolitizimi i komisioneve zgjedhore. KQZ nuk do të jetë më një monopol administrimi partiak. Është propozim i ekspertëve”, tha Balla.
Numri dy i PS tha se marrëveshja ka një bosht të rëndësishëm, rakordimi primar i palëve për të mbyllur reformën deri më 15 mars. “Do të ndryshojë formula e funksionimit të KQZ. Do ndryshojë qasja në sponsporizimin në media dhe reklama televizive. Janë disa prej çështjeve. Do ndryshojë mënyra e ankimimit. Kujtoj zgjedhjet e majit 2011, procedura të zgjatura ankimore dhe thelbi humbte në procedurë. Themeli është depolitizimi. Duke qenë se numëruesit apo komisionerët ishin të emëruar politikisht, urdhëroheshin politikisht, braktisin procesin etj. Pse nuk ndodh kjo në një vend tjetër të BE-së? Sepse zgjedhjet nuk administrohen nga partitë”, u shpreh Balla.
Por edhe bashkëkryetari i reformës zgjedhore, Damian Gjiknuri reagoi ditën e djeshme mbi tryezën që bëri bashkë mazhorancën dhe opozitën. Ai mohoi të ketë pasur ndërhyrje nga diplomatët e huaj për tryezën e përbashkët PD-PS-LSI, duke e quajtur një marrëveshje të mirëfilltë shqiptare. “Dua të theksoj diçka, kjo është marrëveshje e mirëfilltë shqiptare, nuk ka pasur asnjë trysni ndërkombëtare që palët me patjetër të kishin marrëveshje, nuk ka patur asnjë rol ndërkombëtar që palët apo ndërkombëtarët të merrnin rol udhëheqës në këtë proces, përkundrazi kanë inkurajuar dialogun. Ajo çfarë u arrit është dialog i përbashkët, një reflektim i secilës palë për të gjetur mënyrë komunikimi për reformën zgjedhore”, tha Gjiknuri.