Nga Bledi Mane
Xhiku jam, çun me emër në Paskuqan. Para 15 vitesh e lash me barrë nusen time, ajo u tregua burrneshë, e mbajti llafin e më solli në jetë jo vajzë por djalë.
Çuni im e ka emrin Amarildo. Atë kohë u ktheva urgjent nga Spanja dhe shkova direkt te materniteti vetë e nuk i kurseva lekët, ia dhashë doktorit me dorën time 200 euro. Djali dhe nusja ishin dhe janë top që të dy.
Mirëpo kur erdha atëhere në Tiranë më arrestuan pas lindjes së djalit. Më spiunuan dhe se ku ma gjetën një urdhër arresti që kishte lëshuar Italia për dy vrasje që kisha bërë unë me ca vlonjatë në Breshia. Unë e kisha harruar fare por gjykata në Itali më pati dënuar 23 vjet burg. Këto gjykatat tona e njohën vendimin dhe më rasën në qeli.
Më iku petlla fare se gruaja dhe çuni mbetën vetëm ndërsa në Spanjë ia varën punës ata ushtarët e mi te serat me hashash. Nuk u vonova e as nuk përtova, nuk mungonte as vullneti e as leku. Avokati im Jari foli me prokuror Tikun, Tiku me gjykatës Gjinin, u paguan 231 mijë euro, bëra vetëm një vit burg dhe dola si pasha nga qelia.
Te dera e burgut më prisnin çunat e lagjes, hipa në makinën e zezë me xhama të zinj që e ngiste Moni veshur me kostum të zi dhe sa më zbritën te dera e shtëpisë breshëria e një kallashnikovi theu xhamat e zinj, depërtoi brenda meje dhe gëzimi i lirimit tim të zi u nxi si fikja e një neoni me gaz të mbaruar…
Unë pagova 231 mijë euro dhe më vranë, djali pagoi 200 euro dhe është gjallë si kokra e mollës. Doktori gjinekolog vazhdon punën i qetë, prokurori dhe gjykatësi janë fshehur edhe nga vettingu, edhe nga hakmarrja e djalit tim!
Shënim i rëndësishëm/
Këtë letër po ua shkruaj nga ferri ngaqë këto kohë keni filluar një sulm të poshtër ndaj mjekëve.