Kur kanë mbetur edhe pak ditë nga afati përfundimtar i regjistrimit të partive për zgjedhjet lokale, deputeti Ligoraq Karamelo i bën apel PBDNJ-së që të marrë pjesë. Deputeti i ‘opozitës së re’ që hyri hyri në parlament pas vendimit të Partisë Demokratike për të djegur mandatet, thekso se zgjedhjet e 30 qershorit kanë një rëndësi të veçantë sepse komunitetet përfaqësohen dhe zgjedhin përfaqësuesit e tyre.
“Ato kanë një rëndësi të veçantë sepse komunitetet përfaqësohen, zgjedhin përfaqësuesit e tyre dhe ushtrojnë të gjitha kompetencat në zbatim të kushtetutës dhe të konventave ndërkombëtare. Aq më tepër që sot kemi një ligj për minoritetet i cili kërkon aplikim në këto zona.
Kështu që në këtë kuadër është më se e domosdoshme që të gjitha minoritetet, padyshim edhe minoriteti grek do të marrë pjesë në zgjedhjet lokale, sepse pjesëmarrja në zgjedhjet lokale përveç të tjerave, duhet zhveshur edhe nga konteksti politik.
Zgjedhjet lokale në qoftë se vazhdojmë ti konceptojmë si zgjedhje politike është një qëndrim i gabuar”, deklaron Karamelo për Vizion Plus.
Karamelo ishte renditur i shtati në listën e Partisë Demokratike në Korçë nën siglën e Partisë Bashkimi për të Drejtat e Njeriut. Nga partitë qe hynë ne parlament pas djegies se mandateve, deri tani është konfirmuar se Balli Kombëtar Demokrat qe tashme ka deputet kryetarin Alimadhi do te regjistrohet ne zgjedhjet lokale./Sot
