Partia Socialiste ka nisur nga drejtësia prezantimin e programit të ri qeverisës. Përmes një aktiviteti të posaçëm kryeministri Edi Rama i cilësoi si rrezik për reformën në drejtësi presidentin Ilir Meta dhe ish-kryeministrin Sali Berisha.
Rama u shpreh se nëse PS-ja nuk do të ishte në front së bashku me qytetarët, presidenti Ilir Meta dhe Sali Berisha do ta kishin shkatërruar reformën në drejtësi. “PD, LSI dhe KÇK, sot janë 3 këmbët e të keqes me dy koka presidentësh, që kërcënon fatin e reformës në drejtësi.
Është një rrugë tejet e vështirë, me pengesa dhe prita të llojllojshme, ku forcat e kundër reformës rezistojnë, reagojnë, godasin, në mënyrë të ethshme. Në krye të atyre forcave, frymëzuesit dhe udhëheqësit e kundër-reformës janë dy të frikësuarit më të mëdhenj nga drejtësia, janë presidenti dhe ish-presidenti më famëkeq i kësaj republike”, tha Rama.
Kryeministri Rama u shpreh se Meta dhe Berisha mbështeten nga prokurorët dhe gjyqtarët e shkarkuar nga vetingu dhe të tjerë që janë të korruptuar, por që nuk kanë dalë ende para trupës gjykuese. Rama u bëri thirrje qytetarëve për të dalë në votime me qëllim që të largohet përfundimisht Meta, Berisha dhe Kryemadhi dhe jo të votojnë për ta vetëm për të mos votuar PS.
“Presidenti Meta dhe Berisha mbështeten nga kasta e korruptuar e prokurorëve dhe gjyqtarëve që janë fshirë nga vetingu dhe ata të korruptuarit deri sa t’u vijë fshesa e vetingut. Nëse do votoni për PD-LSI se po votoni për ndryshimin apo se nuk doni që të më votoni mua, do bëni një gabim fatal”, tha ndër të tjera Rama.
Rama akuza ndaj Metës dhe Bashës
Kryeministri Edi Rama u shpreh se presidenti Ilir Meta sipas tij e ka shprehur hapur se më 25 prill do bëjë referendum kundër drejtësisë. Teksa foli për marrëveshjen e bërë midis PD-LSI Rama e cilësoi atë si qesharake. Ai thekoi se në zgjedhjet e 25 prillit do të shihet se çfarë do të zgjedhin qytetarët shqiptarë. “Meta e ka thënë hapur 25 prilli do jetë një referendum që do të përmbysë reformën në drejtësi.
Është betuar se do marrë detyrën e kryetarit të opozitës nëse ajo humbet zgjedhjet sepse nuk ka respekt për detyrën dhe Kushtetutën dhe për njerëzit e këtij vendi. Ka hallin se tani e kanë marrë vesh edhe gurët e këtij vendi. Do shohim çfarë do zgjedhin qytetarët më 25 prill, Ilir Metën apo drejtësinë”, tha ai. Ndër të tjera Rama hodhi akuza edhe në drejtim të kreut të PD Lulzim Basha.
Ai u shpreh se Basha nuk është lider i partisë që drejton po një njeri pa karakterin e liderit. Ai vijoi më tej duke thënë se Basha drejtohet nga presidenti Meta dhe nga ish-kryeministri Sali Berisha. “Është dhe Basha, ai nuk është një rrezik në vetvete, as për demokracinë dhe as për drejtësinë, duke qenë një politikan i dobët pa karakterin e një lideri është një kukull, të cilët e mbyllin Lulin në shtëpi me vetë duart e tij për 30 sekonda. Ata mund ta mbyllin Lulin në shtëpi me duart e tij.
Keni parë një koalicion më qesharak paszgjedhor nga dy parti që hyjnë vetëm një zgjedhje. Ajo është një strategji për të lidhur Lulin. Kur Ilir Meta thotë se do të udhëheqë opozitën, do të thotë se do të ngrejë barrikadën me PD, LSI dhe KÇK. Lulzim Basha është thjesht administrator. Janë mbledhur bashkë kuçi dhe maçi jo për të përmbysur qeverinë”, tha Rama.
Roli i PS
Kryeministri Edi Rama ka deklaruar se PS është mbështetja më e madhe e reformës në drejtësi. Këtu përmendi rastin e mjekut Edvin Prifti dhe gjyqtaren Enkeleida Hoxha. “PS dhe unë vetë nuk jemi zgjidhja ideale dhe pa të meta, kemi bërë gabime që i dimë. Por kjo forcë është mbështetësja më e madhe e reformës dhe e së ardhmes së saj. Gjërat nuk kanë qëndruar në vend në drejtësi. Jo aq shpejt sa dëshiroj unë por gjërat po lëvizin, SPAK është futur në veprim rasti më i freskët i asaj gjyqtares së Krujës. Deri dje ka pasur vetëm goditje sporadike, jemi të bindur që ky është vetëm fillimi i një rruge të re, por do ta ketë gjithnjë e më shumë përmasën e pritshmërisë tuaj”, tha ai.