Ilir Meta rezulton ndër politikanët më të pasur në vend. Parlamenti i Shqipërisë ka pasur historikisht persona me pasuri sheikësh, por shumica e tyre kanë qenë biznesmenë dhe pasurinë e kanë vënë përmes veprimtarisë në këto biznese.
Por nëse shohim deklarimet pranë ILDKPI, rezulton se presidenti Meta ka pasuri mjaft të lartë, ndërkohë që duhet theksuar se ai dhe bashkëshortja e tij nuk kanë bërë asnjë punë përveç marrjes me politikë.
Meta u bë deputet pa mbarur universitetin dhe që prej asaj dite ka qenë në Parlament, qeveri dhe tani në Presidencë. Bashkëshortja e tij e ka nisur karrierën në Forumin Rinor të PS, më pas ka vijuar të jetë anëtare e Këshillit Bashkiak Tiranë dhe në fund përfundoi kryetare e LSI dhe deputete në Parlament.
Por nëse shohim deklarimet që ata kanë bërë vit pas viti, pasuria e çiftit presidencial kap shifra miliona euro. Në vitin 2003, Meta ka deklaruar një banesë të përfituar nga privatizimi si dhe një banesë me verandë+lulishte në Golem, 327 m2. Vlera në atë kohë është deklaruar 60 mijë dollarë, ku thuhet se janë marrë kredi. Por ajo që u ka dhënë më shumë të ardhura janë 13 apartamente të përfituara nga Monika Kryemadhi.
Ajo ka marrë 13 apartamente në kuadër të një marrëveshje me një firmë ndërtimi. Shumica e tyre janë shitur nga viti në vit. Po ashtu Meta e Kryemadhi kanë deklaruar një banesë në kryeqytet me sipërfaqe 200 metër katror me vlerë 400 mijë euro. Pjesë e deklarimit është dhe 500 m2 tokë+200m2 truall me vlerë 5 milionë lekë. Ndërkohë dihet publikisht që presidenti ka dhe një banesë te zona e Kodrës së Diellit, por në ILDKP nuk ka asnjë të dhënë për këtë banesë.
Po ashtu kemi banesën te Gjiri i Lalëzit, vlera e së cilës nuk dihet se sa është. Sipas deklarimit, burimi është këmbimi me sipërfaqe ndërtimore 300 metra katrore, ambiente tregtare, sipas kontratës me firmën Agi-Kons shpk, si përfitues 33% të sipërfaqes së ndërtimit si pronar trualli. Edhe 13 apartamentet janë përfituar po nga kjo kompani.
Deklarimet sipas viteve
Deklarimet e para në ILDKP datojnë që prej vitit 2003 dhe në këtë vit presidenti Ilir Meta ka deklaruar apartament 2+1 dhe ka pasur në pronësi vetëm 25 për qind të tij. Po ashtu ka deklaruar një banesë në Golem 327 m2 blerë 60 mijë dollarë, të cilat janë marrë kredi në bankë.
Por e njëjta banesë 3 vite më pas është shitur 300 mijë euro. Po në vitin 2003 zoti Meta ka deklaruar pagën e tij si deputet dhe si ministër. Viti 2004 dhe 2005 nuk kanë sjellë ndryshime për pasurinë e presidenti aktual, ndërsa në 2006 janë shtuar të ardhurat e bashkëshortes, zonjës Monika Kryemadhi, sot drejtuese e LSI. Interesant është fakti se në vitin 2004 u themelua dhe LSI.
Në vitin 2006 të ardhurat e Metës dhe Kryemadhit janë shtuar me 300 mijë euro, pasi kanë shitur banesën në Golem. Në vitin 2007 Meta ka deklaruar pagën e tij si deputet, ndërsa Kryemadhi pagën si anëtare të Këshillit Bashkiak. Por kryetarja e LSI ka deklaruar dhe blerje 500 m2 tokë+200m2 truall me vlerë 5 milionë lekë. Në vitin 2008 Meta dhe Kryemadhi kanë deklaruar dhe llogaritë e tyre të para në bankë. Po ashtu kanë deklaruar dhe të ardhurat nga puna. E njëjta situatë dhe në vitin 2009.
Por në vitin 2010 dhe për koincidencë vit kur LSI ishte në qeveri me PD, pasuria e tyre ka nisur të lëvizë. Në deklarimin që Meta e Kryemadhi kanë bërë pranë ILDKP, bie në sy se kanë disa llogari edhe fëmijët e tyre, shumica të hapura për qëllime studimi.
Në vitin 2017, Monika Kryemadhi ka deklaruar llogari 140 mijë paund, pagesë për shkollimin e fëmijëve ose 160 mijë euro. Në vitin 2019 Kryemadhi ka deklaruar shpenzime për shkollën e fëmijëve 11.940 paund. Pra kemi një llogari bankare dy emërore Bora Metaj dhe Besar Metaj.
Deklarimi për vitin 2020
Ilir Meta, president
-Pakësim në llogarinë personale në lekë, 273.731 lekë
-Shtim llogarie e përbashkët Ilir Metaj & Besar Metaj, 1 073 lekë
-Të ardhurat nga paga, 1981.114 lekë
-Të ardhurat nga dietat, 600 Euro dhe 960 Dollarë
Monika Kryemadhi, bashkëshortja
-Përfitime nga shitja e 13 apartamenteve vite më parë, vijojnë pagesat në 3 kontrata: 10 000 Euro; 38.084 Euro; 2.940 Euro
-Llogaria në Euro pakësuara, 39. 459 Euro
-Llogaria në paund pakësuar, 59 930 GBP
-Shtim në llogarinë në lek Bora Metaj & Monika Kryemadhi, 6.033 Lekë
Pagë kalimtare ISSH, 940.620 lekë
-Over draft VISA Card, shuma e shlyer deri më 31 dhjetor 2020, 1.836.587 Lekë; shuma e mbetur si detyrim 394.587 Lekë
-Over draft MASTER Card, 1.564 Euro detyrime
Besar Metaj (Djali)
-Pakësimi i llogarisë së përbashkët Besar Metaj dhe Bora Metaj, 8 950 GBP
-Shtim llogarie e përbashkët Ilir Metaj dhe Besar Metaj, 1 073 Lekë
-Pakësim i llogarisë së kartës VISA 573.398 Lekë
Bora Metaj (Vajza)
-Shtim në llogarinë e përbashkët Bora Metaj dhe Monika Kryemadhi, 6 933 Lekë
-Derdhur nga mamaja ime në Visa Card, 17 000 Euro
Deklarimi për vitin 2019
Monika Kryemadhi
Kontratë premtim shitje për apartament me sipërfaqe 76.88 m2 (deklaruar në 2014) me 42 284 euro arkëtuar 38 901 euro.
Kontratë premtim shitje për apartament me sipërfaqe 133.7 m2 (deklaruar në 2014) me vlerë 64103 euro, deri në dhjetor 2018 asnjë arkëtim për këtë kontratë.
Pagesë si rrjedhojë e kontratës likujdim i këstit të dytë me vlerë 17 864 000 lekë konvertuar në 145 000 euro.
Llogari bankare e shtuar në euro me vlerë 57.665 euro.
Ilir Meta
Shtim i llogarisë në lek nga të ardhurat nga pagat – 1319680 lekë
Llogari dyemërore Besar Metaj dhe Ilir Metaj 28409 lekë
Të ardhura neto nga paga në Presidencë – 2250183 lekë
Të ardhurat nga dietat jashtë vendit – 6480 euro
Të ardhura nga dietat jashtë vendit – 2340 dollarë
Të ardhura në cilësinë e kryetari të ish-Këshillit të Lartë të Drejtësisë – 85000 lekë
Të ardhura nga honoraret për mbledhjet e ish-Këshillit të Lartë të Drejtësisë 42500 lekë
Overd draft – 133854 lekë
Llogari bankare dyemërore në emër të Bora Metaj dhe Besar Metaj. Arkëtuar nga nëna Monika Kryemadhi për shpenzime për shkollën – 11940 paund
Ja disa prej deklarimeve kryesore nga Meta e Kryemadhi
1. Meta apartament 2+1 përfituar nga privatizimi, zotëron 25%
2. Banesë +verandë+lulishte në Golem, 327 m2, me vlerë 60 mijë dollarë dhe zotërim 50%. Marrë me hua bankare.
3. Shitur banesa në Golem, 300 mijë euro
4. Apartament me sip. 200 m2, vlerë 400 000 euro, në Rr. “Brigada 8”, Tiranë. Burimi: 200 000 euro është financuar nga shitja e një shtëpie pushimi në Qerret, pjesa tjetër me kredi.
5. Apartament me sip. 99.5 m2, përfituar me privatizim, pa vlerë të specifikuar ku Znj. Kryemadhi zotëron 1/3, marrë me trashëgimi.
6. Apartament me sip. 75.5 m2, pa vlerë të specifikuar, përfituar me trashëgimi nga i ati. Znj. Kryemadhi zotëron 1/3.
7. Kryemadhi, deklaron në 2013 tokë me sip. 1200 m2, vlerë 5 000 000 lekë, ku 700 m2 janë blerë me të ardhurat e veta në vitin 2007, ndërsa pjesa tjetër është përfituar me dhurim në vitin 1995 nga i vëllai.
8. Apartament banimi 2 kate, me sipërfaqe 317 metra katror në fshatin turistik në Gjirin e Lalzit Durrës me kontratë sipërmarrjeje me Lura sh.p.k. (Burimi, këmbimi me sipërfaqe ndërtimore 300 metra katrore, ambiente tregtare, sipas kontratës me firmën Agi-Kons shpk, si përfitues 33 % të sipërfaqes së ndërtimit si pronar trualli)
9. Kryemadhi, pronare me 100 % e 13 apartamenteve të banimit me sip. totale 1444.8 m2, përfituar nga shtojca e kontratës së sipërmarrjes me Agi-Kons shpk, për caktimin në natyrë të pjesës takuese.
10. Kryemadhi, të ardhura nga shitja e apartamentit të banimit, 57 798 euro.
11. Kryemadhi, kontratë shitje e apartamenti të banimit, 64 020 euro.
12. Kryemadhi ka shitur një apartament me sipërfaqe 104.74 m2, në vlerën 60 958 euro, nga të cilat janë arkëtuar 55 503 euro dhe kanë mbetur për tu arkëtuar nga të tretë 5 455 Euro.
13. Kryemadhi ka shitur apartament me sipërfaqe 166.2 m2, me vlerë shitje, te arkëtuar plotësisht 85 088 euro.
14. Kryemadhi ka shitur apartament banimi me sipërfaqe 108.5 m2, vlera e shitjes, e arkëtuar 57 885 euro.
15. Kryemadhi, shitje apartament banimi, 101 m2, 55 550 euro.
16. Kryemadhi, shitje apartament banimi, 166 m2, 58 806 euro.
17. Kryemadhi llogari në Credins 140 mijë paund pagesë për shkollimin e fëmijëve ose 160 mijë euro.
18. Kryemadhi, gjendja e llogarisë bankare, 56 778 euro.
19. Kryemadhi, gjendja e llogarisë bankare, 2 336 669 lekë.
20. Kryemadhi, gjendja e llogarisë bankare (në emër të fëmijës), 11 038 euro.
21. Shtesë në llogari bankare zoti Meta me vlerë 1 815 082 lekë
22. Llogari bankare shtuar gjatë 2016 me 174 403 euro.
23. Kryemadhi llogari në Credins, pakësuar 131 053 euro.