Qeveria miratoi projektaktin për mbylljen e kantierit të vjetër të Pashalimanit, i cili do të vihet në dispozicion të shoqërisë Fincantieri, në kuadër të një sipërmarrjeje të përbashkët me shoqërinë KAYO.
Ministri i Mbrojtjes, Ermal Nufi, tha se ky vendim i hap rrugën zhvillimit të kantierit detar të Pashalimanit dhe krijimit të një bashkëpunimi tregtar me një nga kompanitë më të mëdha në botë për prodhimin e anijeve.
“Tjetër vendim është edhe miratimi i projektaktit për mbylljen e kantierit të vjetër të Pashalimanit, i cili do të vihet në dispozicion të shoqërisë Fincantieri. Edhe ky akt i hap rrugën zhvillimit të atij kantieri detar që ka prodhuar tashmë anijet në Republikën e Shqipërisë për zhvillimin e një bashkëpunimi tregtar të jashtëzakonshëm me shoqërinë më të madhe në botë për prodhimin e anijeve që është shoqëria Fincantieri së bashku me shoqërinë KAYO në këtë bashkim të ri për këtë sipërmarrje të përbashkët të re”, tha ai.
Sipas Nufit, në kantier do të prodhohen anije me gjatësi deri në 82 metra, duke shënuar një hap të rëndësishëm për rritjen e kapaciteteve prodhuese dhe teknologjike të industrisë detare në Shqipëri.
Ai theksoi se kantieri do të transformohet plotësisht dhe do të përshtatet për ndërtimin e anijeve të kësaj kategorie, ndërsa investimi pritet të sjellë përfitime si për sigurinë kombëtare, ashtu edhe për zhvillimin e industrisë teknologjike dhe krijimin e vendeve të reja të punës.
“Do të prodhohen anije deri në 82 metra që është një hap i jashtëzakonshëm për sa i përket jo vetëm kapaciteteve prodhuese por edhe kapaciteteve teknologjike në Republikën e Shqipërisë. Ai kantier do të shndërrohet i tëri dhe do të përshtatet për prodhimin e anijeve të këtij përmasave. Është një vlerë e shtuar jo vetëm për sigurinë kombëtare por edhe për prodhimin teknologjik dhe për vendet e punës”, tha ai.
