Plani i qeverisë për të nxjerrë në pension të parakohshëm policët që mbushin moshën 55 vjeç duket se do të gjejë zbatim shumë shpejt. Dje nisi sesioni i ri parlamentar dhe në Kuvend është depozituar nga ana e Këshillit të Ministrave, projektligji “Për trajtimin financiar të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme, pas ndërprerjes së marrëdhënieve të punës”, nga i cili do të përfitojnë rreth 600 persona.
Sipas relacionit, projektligji synon që t’i japë mundësi punonjësve të Policisë së Shtetit, punonjësve të Gardës së Republikës dhe Shërbimit për Çështjet e Brendshme dhe Ankesat, që kanë një karrierë të gjatë në këto struktura, të përfitojnë trajtim financiar në rast se ata dëshirojnë të ndërpresin shërbimin ose nëse titullarët e institucioneve përkatëse kërkojnë që të ndërpresin marrëdhënien e punës përpara plotësimit të moshës për pension të plotë pleqërie.
Në vlerësimin e kërkesës për të ndërprerë shërbimin merret në konsideratë edhe pamundësia fizike e punonjësit për të vazhduar karrierën e mëtejshme. Gjithashtu, propozimet e këtij projektligji synojnë uljen e moshës mesatare të punonjësve të institucioneve të sipërpërmendura, duke siguruar që në këto institucione të rëndësishme të sigurisë të krijohet mundësia e punësimit të gjeneratës së re, në moshë më aktive dhe efiçente në luftën kundër krimit në përgjithësi e atij të organizuar në veçanti, si dhe rritjen e parametrave të rendit e sigurisë publike në vend.
Detajet e ligjit
Neni 2 i ligjit parashikon subjektet përfituese të trajtimit financiar, konkretisht, punonjësit e Policisë së Shtetit, të Gardës së Republikës dhe të Shërbimit për Çështjet e Brendshme dhe Ankesat me gradë dhe që plotësojnë kriteret. Ndërsa neni 4 përcakton kriteret e përfitimit të trajtimit financiar nga efektivët. Konkretisht: Të kenë plotësuar moshën 55 vjeç dhe të kenë kryer 30 vite shërbim në strukturat e Policisë së Shtetit, të Gardës së Republikës, Shërbimit për
Çështjet e Brendshme dhe Ankesat, në Ministrinë e Brendshme apo struktura të tjera shtetërore me gradë. Kjo e fundit për arsye se ka punonjës që kanë ardhur në strukturat e sipërpërmendura nga institucione ushtarake apo institucione të tjera të sigurisë dhe një pjesë të vjetërsisë në punë e kanë në këto struktura. Sipas ligjit, trajtimi financiar është në masën 50% të pagës mujore neto, në momentin e ndërprerjes së marrëdhënieve të punës me shërbimin përkatës. Më tej bëhet e ditur se trajtimi financiar pas ndërprerjes së karrierës përfitohet me kërkesë të punonjësit, ose kërkesë të titullarit të institucionit përkatës dhe miratohet nga Komisioni i Posaçëm.
Përbërja dhe kriteret e vlerësimit të Komisionit të Posaçëm përcaktohen me vendim të Këshillit të Ministrave. Neni 7 përcakton detyrimet e punonjësit të Policisë së Shtetit, të Gardës së Republikës dhe të Shërbimit për Çështjet e Brendshme dhe Ankesat, në Ministrinë e Brendshme, që përfitojnë sipas këtij ligji. Subjektet e përfitimit kanë detyrimin t’i përgjigjen nevojave të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, për t’u aktivizuar në shërbim në interes të realizimit të misionit të tyre deri në 700 orë në vit. Ligji është futur në kalendarin e punimeve dhe do të miratohet brenda pak javësh.