Parlamenti ka nisur dje sesionin e ri, i cili duket se do të jetë i ngjeshur. Në orën 17.00 deputetët u mblodhën në seancë plenare, ku secili grup parlamentar bëri të ditur qëllimet për vitin 2020. Po dje u mblodh edhe Konferenca e Kryetarëve, e cila miratoi programin dhe kalendarin 3-javor të punimeve. Ajo që bie në sy është se pjesë e kalendarit janë dhe ligji për statusin e gjyqtarëve dhe prokurorëve, si dhe ligji për Gjykatën Kushtetuese.
Sipas kalendarit, miratimi i tyre do të bëhet më 3 shkurt. Të dyja këto ligje kanë si qëllim rrudhjen e kompetencave për presidentin Ilir Meta. Pak muaj më parë pati përplasje të shumta sa i takon emërimeve në Gjykatën Kushtetuese dhe për të shmangur një bllokadë të dytë PS vendosi të ndërhyjë në ligj. Ndryshimet në ligjin për Kushtetuesen kanë futur dhe alternativa të reja betimi, siç është betimi me shkrim.
“Presidenti i Republikës organizon ceremoninë e betimit jo më vonë se 10 ditë nga data e zgjedhjes, emërimit ose shpalljes të emëruar të anëtarit të Gjykatës Kushtetuese. Nëse anëtari i Gjykatës Kushtetuese nuk thirret për të bërë betimin, pas përfundimit të këtij afati, ai kryen betimin në formë të shkruar dhe ia dërgon atë Presidentit të Republikës, organit të emërtesës dhe Gjykatës Kushtetuese. Data e organizimit të ceremonisë së betimit ose data e dërgimit të betimit me shkrim, konsiderohet si dita e betimit dhe e fillimit të detyrës së gjyqtarit të Gjykatës Kushtetuese dhe përfshihet në dosjen e tij personale. Në rast se gjyqtari nuk pranon të bëjë betimin, mandati i tij përfundon”, thuhet në draft.
Ndërkohë në ligjin për statusin e gjyqtarit dhe prokurorit, presidentit i hiqet e drejta e betimit të anëtarëve të Gjykatës së Lartë dhe të SPAK. Dy ligjet janë futur në kalendar dhe pritet nga java e ardhshme të nisin diskutimet në komision. Derisa të vuloset shkarkimi i Presidentit, pritet që atij t’i hiqet mundësia e bllokimit të njerëzve të drejtësisë.
Ruçi mesazh Metës
Një mesazh në drejtim të kreut të shtetit dha dje dhe kreu i Parlamentit, Gramoz Ruçi. Në fjalën e mbajtur para deputetëve, ai u shpreh se pavarësisht përplasjeve për Kushtetuesen, kjo gjykatë nuk do të bllokohet, por shumë shpejt do të jetë funksionale. “Edhe gjatë këtij sesioni, reforma në drejtësi përbën një nga prioritetet më të rëndësishme. Puna është përqendruar në ndërtimin e organeve të reja. KLP dhe KLGJ po vijojnë në përmbushjen e funksioneve dhe raportojnë për veprimtarinë e tyre. Kuvendi është kujdesur që në buxhetin e vitit 2020 të parashikojë fonde për këto institucione. Më 11 nëntor Kuvendi zgjodhi Elsa Toskën dhe Fjona Papajorgjin anëtare në Gjykatë Kushtetuese. Gjykata Kushtetuese, pavarësisht kontestimeve ka filluar nga funksionimi dhe është drejt plotësimit të saj”, tha Ruçi. Ai u ndal dhe te reforma zgjedhore, duke bërë të ditur se ajo do të mbyllet brenda marsit.
“Siç jeni në dijeni, u arrit konsensusi midis të gjithë faktorëve politikë, parlamentarë dhe joparlamentarë, qeveri dhe opozitë, për të kryer reformën zgjedhore brenda datës 15 mars dhe për ta sjellë projektin për votim në Kuvend”, bëri me dije kryetari i Kuvendit, që ndër të tjera shtoi edhe bërjen funksionale të Platformës Ndërinstitucionale Online, si ndër arritjet në kontrollin e mbikëqyrjes parlamentare. Kryetari i Kuvendit i dha theks objektivave të sesionit të ri parlamentar: çelja e negociatave të anëtarësimit përpara majit të këtij viti, përfundimi i reformës zgjedhore brenda muajit mars, ngritja dhe plotësimi përfundimtar i të gjitha organeve të drejtësisë, rishikimi dhe plotësimi i legjislacionit në fushën e marrëdhënieve me natyrën, burimet natyrore, mjedisin, të harmonizuara këto me legjislacionin anti-sizmik./ Kliti Topalli