Kryetarja e Bashkisë së Shkodrës, Voltana Ademi tha se deklarata e saj për të gjuajtur me molotov është nxjerrë nga konteksti. Ajo i tha këto fjalë e ftuar në një emision lokal ndërsa po komentonte veprimet e opozitës në protestë.
Deklarata e bërë tërhoqi vëmendje, me socialistët që e cilësuan të pazakontë një qëndrim të tillë.
Postimi
“Molotov” ka shqetësuar deri në trembje shumëkënd! E artikuluar mjaft qartë nga unë në një intervistë televizive, kanë tentuar e po te tentojnë ta nxjerrin nga konteksti. Në fakt, këto katër vite por edhe më herët, Shkodra dhe shkodranët kanë pasur mijëra arsye për të përdorur “molotov”. U anashkaluan deri në harresë të plotë nga kjo qeveri, u burgosën, u dhunuan, iu hoq ndihma ekonomike, iu hoq buka e gojës i pushtoi e i dhunoi kriminaliteti e pushteti i kriminelëve.
E sot po i kërkohet të mbyllin sy e veshë, kur po u rrëmbehet ajo që e fituan me mund e sakrifica, madje edhe duke sakrifikuar jetën: Demokracia, e drejta për të zgjedhur! E drejta per të jetuar e punuar të lirë! E drejta për të qenë të sigurtë e për të gëzuar vendin e vet!
E po e artikuloj edhe një herë:
“… me “molotov” për të bërë shumë zhurmë! Shumë zhurmë! “. Ashtu siç kanë ushtuar e ushtojnë sheshet e kryeqyteteve perëndimore në Itali, Francë, Greqi etj.
Fjalën time duhet ta kishit transmetuar të plotë e jo gjysma- gjysma! E keni të postuar të gjithën, prej kater ditësh, në faqen time Facebook!
Protesta, figurativisht edhe me “molotov” është një mënyrë për t’u mbrojtur nga ata që po na vrasin! Është mënyrë për të bërë zhurmë për t’u dëgjuar!
Po prap do të protestojmë, me tërë fuqinë! Për të mbledhur të tjerë e sa më shumë!
E figurativisht me “molotov” , për të zhurmuar për dyert e mbyllura të institucioneve, dhe burgun që Edi Rama po i ndërton përditë njerëzve të thjeshtë, e qe po i vret përditë!
Kemi prekur fundin! Nga zhurma duhet të shqetësohen ata që kanë frikë! Dhe me të vertetë duhet të kenë frikë! Nga njerëzit e thjeshtë dhe nga e keqja që kanë mbjellur!