Reforma zgjedhore ka mbetur peng e opozitës. Takimet dy ditore të ambasadores amerikane konkluduan me hartimin e një drafti final, por diçka ndryshoi në sekondat e fundit, pasi LSI nuk ka mbetur e kënaqur me draftin final.
Gazeta e kishte paralajmëruar prej kohësh se dyshja Meta-Berisha i druhej një pakti PD-PS dhe ditët e fundit u tregua qartë. Përfaqësuesit e PD dhe LSI braktisën takimin me ambasadoren, ndërsa dje nuk pati asnjë reagim për reformën, çka konfirmon se brenda opozitës ujërat janë trazuar ndjeshëm.
Të mërkurën në mbrëmje dhe dje Basha ka pasur takime me aleatët, por përplasjet më të forta kanë ndodhur me LSI sa i takon përbërjes së komisioneve. Kryeministri Rama dha detaje të plota dje mbi skemën e propozuar, ku komisionerët do të jenë nëpunës civilë, ndërsa palët politike do të kenë të drejtën e vëzhguesit, 2 nga mazhoranca dhe dy nga opozita. Në çdo qendër votimi do të ketë kamera të instaluara dhe vëzhguesit do kenë përballë monitorë që të monitorojnë procesin.
Por si depolitizimi, ndarja e vëzhguesve, por dhe tërheqja nga qeveria teknike mësohet se ndan palët. LSI nuk e do depolitizimin pasi pjesa dërrmuese e administratës është e PS-PD. Ndërsa sa i takon vëzhguesve kërkon të drejta të barabarta me PD gjë që nuk pranohet nga kryedemokrati Basha, i cili nuk ja ka besën LSI. Po ashtu përplasje ka dhe për qeverinë teknike. PD është tërhequr nga qeveria teknike dhe LSI nuk e ka mbështetur.
Gazeta ka mësuar se Kryemadhi ka lëshuar akuza të forta ndaj Bashës, duke e akuzuar për tradhti e puç ndaj LSI. Ajo i ka thënë se ishte ai që i detyroi të digjnin mandatet dhe më pas i la në mes të rrugës, ndërsa tani kërkon t’i marrë dhe komisionerët. Po ashtu e ka akuzuar se ka dështuar me protestat. Ndërkohë një burim i tha gazetës se situata ka qenë aq e tensionuar sa nuk kanë munguar dhe goditjet ndaj ambasadorëve. Teksa Vasili e Bylykbashi nuk po shkonin në mbledhje, ka pasur një telefonatë nga ambasada amerikane, por askush nuk është përgjigjur gjë që solli dhe reagimin e Yuri Kim duke i dhënë ultimatum të prerë liderit të PD.
Meta e Berisha
Por e gjithë loja duket se është skemë e dyshes Meta-Berisha. Sipas burimeve, gjatë gjithë ditës së djeshme LSI ka pasur konsulta me presidentin, sikur ai të ishte kryetar i saj. Arsyeja se përse nuk u shkua në tryezë ishte pikërisht se LSI priste konfirmimin e Metës. Nga ana tjetër Basha ka pasur konsulta dhe me Berishën, ku ky i fundit këmbëngul se LSI duhet të jetë pjesë e koalicionit dhe Basha të qëndrojë larg një pakti të ri me PS. Pra në vija të përgjithshme ata që mbajnë peng procesin janë Meta e Berisha, pasi nëse ata nuk japin “OK”, PD dhe LSI nuk pranojnë draftin e dakordësuar.
Lëvizjet politike
Dita e djeshme ka sjellë shumë lëvizje politike. Ambasadori i BE, Luigi Soreca mblodhi në selinë e tij ambasadoren e SHBA, ambasadorin gjerman, atë të Britanisë së Madhe dhe ambasadorin e OSBE, ku është diskutuar për mbylljen e reformës zgjedhore. Pas takimit ambasadori gjerman ka pasur një drekë punë me Bashën po për këtë çështje. Pasdite lideri i PD mblodhi në seli aleatët e tij për të diskutuar se si do të vendoset. Ambasadorët edhe dje kanë qenë në pritje dhe nuk pati asnjë përgjigje nga PD nëse e pranon draftin final apo do të kërkojë rishikim. Por ajo që bie në sy është se Basha është mes dy zjarreve. Nga njëra anë është Meta e Berisha dhe nga krahu tjetër ndërkombëtarët. Tani lideri i PD duhet të zgjedhë mes Berishës-Metës e SHBA-BE.