Shtetet e Bashkuara të Amerikës iu kanë dërguar dje një tjetër mesazh të korruptuarve. Në kuadër të festës së Pavarësisë, Sekretari Amerikan i Shtetit, Mike Pompeo, teksa ka dërguar një mesazh urimi dhe solidarizimi për 28-29 nëntorin, ka shprehur edhe një herë gatishmërinë e SHBA për të mbështetur reformat në Shqipëri.
Në deklaratën e tij që është shpërndarë nga ambasada amerikane në Tiranë, zoti Pompeo e ka ndalur theksin tek reforma në drejtësi për të cilën thekson se ajo mbështet fuqishëm nga Shtetet e Bashkuara të Amerikës, ndërsa shton se Amerika do të punojë fort, në mënyrë që Shqipëria të ketë një drejtësi të pavarur. “Ne përshëndesim përpjekjet e qeverisë së Shqipërisë për të zbatuar reformat e nevojshme, përfshirë reformat që synojnë forcimin e një sistemi drejtësie të pavarur.
Ne vlerësojmë thellësisht kontributet pozitive të Shqipërisë në koalicionin e NATO-s dhe mirëpresim udhëheqjen e Shqipërisë si Presidente e OSBE-së për vitin 2020. Miqësia midis Shteteve të Bashkuara dhe Shqipërisë qëndron si një shtyllë e qëndrueshme paqeje dhe stabiliteti dhe ne mirëpresim akoma edhe më shumë vite miqësie dhe bashkëpunimi”, deklaroi Pompeo. Pra, ky reagim i SHBA është një mesazh i qartë dhe shkon drejtpërdrejt për të korruptuarit, për të cilët Amerika thekson se ata nuk do të kenë më vend në zyrat e shtetit dhe sidomos në sistemin e drejtësisë.
SHBA mbështet integrimin e Shqipërisë në BE
Por përveç mbështetjes së madhe që Shtetet e Bashkuara të Amerikës po i japin reformave, sidomos asaj në drejtësi, Sekretari Amerikan i Shtetit, Mike Pompeo vë në dukje faktin se marrëdhëniet mes dy vendeve në këto tre dekada post rënies së diktaturës komuniste janë të mira, ndërsa thekson se SHBA mbështet integrimin e Shqipërisë në Bashkimin Europian. Sipas zotit Pompeo, partneriteti mes SHBA-ve dhe Shqipërisë është i qenësishëm dhe reciprok. “Prej rënies së komunizmit tridhjetë vjet më parë, Shqipëria dhe Shtetet e Bashkuara kanë ndërtuar një partneritet gjithnjë e më të fortë. Shtetet e Bashkuara mbështesin me forcë rrugën e Shqipërisë drejt integrimit europian dhe përgëzojnë vendosmërinë e Shqipërisë në arritjen e këtij qëllimi”, është shprehur zoti Pompeo, thuhet në statusin e ambasadës amerikane në Tiranë.
Amerika solidarizohet me viktimat e tërmetit
Sekretari Amerikan i Shtetit, Mike Pompeo vijon më tej në deklaratën e tij, teksa shpreh solidaritetin me Shqipërinë për ditët e vështira që po kalon si pasojë e tërmetit katastrofik që shkaktoi vdekjen e 42 personave, plagosjen e qindra të tjerëve dhe dëme ta pallogaritshme materiale. “Ndërsa Shqipëria përkujton solemnisht Ditën e saj të Pavarësisë, ne përcjellim ngushëllimet tona më të thella për ata që humbën jetën në tërmetin e kësaj jave. Sot, lutjet tona shkojnë për familjet e tyre, si dhe për njerëzit e plagosur. Në emër të popullit amerikan, ne ju urojmë shërim të shpejtë të gjithë të prekurve. Edhe tani, ashtu si në kohë të tjera të vështira, Shtetet e Bashkuara qëndrojnë në krah të miqve tanë në Shqipëri”, nënvizoi Sekretari i Amerikan i Shtetit, Michael R. Pompeo, në deklaratën e tij, në kuadër të Ditës së Pavarësisë së Shqipërisë.
Somario
Ne përshëndesim përpjekjet e qeverisë së Shqipërisë për të zbatuar reformat e nevojshme, përfshirë reformat që synojnë forcimin e një sistemi drejtësie të pavarur. Ne vlerësojmë thellësisht kontributet pozitive të Shqipërisë në koalicionin e NATO-s dhe mirëpresim udhëheqjen e Shqipërisë si Presidente e OSBE-së për vitin 2020…/ Rigels Seliman