Ish-ministrja e Jashtme, Elisa Spiropali ka shpërthyer me nervozizëm në sallën e Kuvendit ndaj shkarkimit të saj nga detyra. Gjatë seancës plenare ku u diskutua dekreti i presidentit për emërimin e ministrave të rinj, Spiropali nuk e fshehu acarimin me kryeministrin Edi Rama dhe la të kuptohej se vendimi për largimin e saj ishte i ditur më herët nga kundërshtarët politikë.
Nga salla e Kuvendit, ajo dërgoi një mesazh të koduar Kryeministrut, duke deklaruar se ish-kryeministri Sali Berisha kishte paralajmëruar largimin e saj përpara se ky vendim të bëhej publik.
“Jam e qartë dhe jam e qetë. E vetmja gjë për të cilën më vjen keq është që largimin tim e paralajmëroi Sali Berisha në sallën e Kuvendit dhe jo ndonjë tjetër. Vetëm për këtë jam e habitur, që i doli fjala, për asgjë tjetër”, u shpreh Spiropali gjatë replikës së saj në seancë.
Në mënyrë të çuditshme, në momentin e votimit të dekreteve, ishte pikërisht Berisha që i doli në mbrojtje me votë Spiropalit. Deputetët e PD, Sali Berisha dhe Jozefina Topalli votuan kundër shkarkimit të Spiropalit nga detyra. Gjithësesi, kjo votë nuk i shërbeu shumë Spiropalit, e cila u shkarkua me votat e socialistëve.
