Të ardhurat nga turizmi në Shqipëri vijojnë të shënojnë rritje, duke arritur në 1 miliardë 376 milionë euro gjatë tremujorit të dytë të vitit 2026, nga 1 miliardë 224 milionë euro në të njëjtën periudhë të një viti më parë.
Sipas raportit të Bankës së Shqipërisë, kjo përkthehet në një rritje prej rreth 152 milionë eurosh, ose afërsisht 12.4%.
Në të njëjtën periudhë, edhe shpenzimet e shqiptarëve për udhëtime jashtë vendit janë rritur. Ato arritën në 783 milionë euro, nga rreth 721 milionë euro një vit më parë, me një rritje prej afro 62 milionë eurosh, ose 8.6%.
Ndërsa si periudhë gjashtëmujore të huajt kanë shpenzuar në Shqipëri 2.3 miliardë euro nga rreth 2 miliardë euro që ishte shifra vjet.
Rritja e të ardhurave nga turizmi vjet edhe për shkak të rritjes së numrit të turistëve që gjatë kësaj periudhe kanë hyrë në Shqipëri. Sipas INSTAT, në janar-qershor 2026, Shqipëria priti 5.059.069 vizitorë të huaj, rreth 297 mijë më shumë se në të njëjtën periudhë të vitit 2025.
Praktikisht nëse përpjesëtojmë totalin e të ardhurave me numrin e vizitorëve të huaj, rezulton se një i huaj ka shpenzuar në vend mesatarisht 470 euro, nga 440 euro që përllogaritej shpenzimi në vitin e kaluar për të njëjtën përudhë.
Të dhënat tregojnë kështu një zgjerim të aktivitetit turistik, me më shumë vizitorë të huaj dhe të ardhura më të larta nga turizmi, ndërsa në të njëjtën kohë shqiptarët po shpenzojnë më shumë për udhëtime jashtë vendit./Eliza Gjediku
