Një histori e rrallë jetëgjatësie vjen nga fshati Ferras i Kuçovës, ku Qamile Marra, 117 vjeçe, po tërheq vëmendjen e mediave ndërkombëtare. E njohur si Nënë Qamilja, ajo mund të jetë gruaja më e moshuar në botë, nëse mosha e saj konfirmohet zyrtarisht nga organizatat që verifikojnë rekordet e jetëgjatësisë.
Historia e saj është pasqyruar nga Agjencia Franceze e Lajmeve (AFP), ndërsa reportazhi është publikuar edhe nga media të huaja, përfshirë NDTV-në apo BBC. Vëmendja ndërkombëtare është përqendruar jo vetëm te mosha e saj e jashtëzakonshme, por edhe te mënyra e thjeshtë me të cilën ajo vazhdon të jetojë.
Sipas dokumenteve që disponon familja, Qamile Marra ka lindur më 19 gusht 1909. Nëse kjo datëlindje konfirmohet përmes procesit ndërkombëtar të verifikimit, ajo do të ishte dy ditë më e madhe se britanikja Ethel Caterham, e cila njihet nga Guinness World Records si personi më i moshuar në botë. Megjithatë, deri tani, mosha e Nënë Qamiles nuk është konfirmuar zyrtarisht si rekord botëror.
E lindur në kohën kur Shqipëria ishte ende pjesë e Perandorisë Osmane, ajo ka përjetuar dy luftëra botërore, ndryshime të mëdha historike dhe dekada të tëra të historisë shqiptare. Pavarësisht viteve të shumta, Qamilja vazhdon të ruajë lidhjen me shtëpinë dhe natyrën.
Ajo zgjohet herët, kujdeset për oborrin, lulet dhe pulat, pi kafen e saj të preferuar dhe shëtit në pemishten pranë shtëpisë, ku ndalet herë pas here për të mbledhur shegë.
“Jeta është e bukur, si mali i Tomorrit në lulëzim”, është shprehur ajo për AFP-në, duke përmbledhur me pak fjalë mënyrën e saj të të parit të jetës.
Kur pyetet për sekretin e jetëgjatësisë, përgjigjja e saj është po aq e thjeshtë: “Jeton aq sa e ka caktuar Zoti!”
Sipas djalit të saj, Hysenit, 80 vjeç, e ëma gëzon shëndet të mirë dhe nuk ka përdorur ilaçe. Ai ka treguar se autoritetet ia kishin ndërprerë pensionin kur ajo mbushi 100 vjeç, pasi nuk besonin se ishte ende gjallë. Familjes iu desh të paraqiste dokumente dhe dëshmi për të vërtetuar se Qamilja jetonte ende.
Mes dokumenteve që disponon familja janë një certifikatë lindjeje e lëshuar në vitin 1945, një pasaportë e vitit 1978 dhe një kartë identiteti e kohëve të fundit, të cilat shënojnë të njëjtën datëlindje. Të afërmit e saj kanë kontaktuar edhe Guinness World Records për të paraqitur rastin e saj, por verifikimi i një moshe kaq të rrallë kërkon dokumentacion të mjaftueshëm nga periudha të ndryshme të jetës.
Së fundmi, qeveria shqiptare i ka akorduar një pension të posaçëm shtetëror në nder të moshës së saj.
Qamile Marra ka sjellë në jetë shtatë fëmijë dhe ka parë të rriten pesë breza të familjes së saj. Bashkëshorti i ka ndërruar jetë 36 vjet më parë, por ajo e kujton ende me buzëqeshje martesën e tyre, e cila, megjithëse ishte lidhur me mblesëri, u shndërrua në një marrëdhënie të fortë.
Ajo gjen lumturi te familjarët që e vizitojnë dhe te jeta e përditshme në fshatin ku ka kaluar thuajse gjithë jetën.
Për Nënë Qamilen, fama ndërkombëtare dhe mundësia për të hyrë në librat e rekordeve duket se kanë pak rëndësi. Në moshën 117-vjeçare, ajo vazhdon të shijojë ditët mes familjes dhe natyrës, ndërsa historia e saj ka dalë përtej kufijve të Shqipërisë.
