Kuvendi ka zbardhur rezolutën për Këshillin e Lartë Gjyqësor, ku kërkon që të plotësohen të gjitha vakancat në Gjykatën e Lartë. Në rezolutën e cila do miratohet në Kuvend, mazhoranca ka parashtruar 10 kërkesa për Këshillin e Lartë Gjyqësor.
Kërkesa kryesore është ajo e shpalljes së menjëhershme të të gjitha vendeve në Gjykatën e Lartë dhe përmbyllja në një kohë sa më të shpejtë të procesit të plotësimit të këtyre vendeve.
“Për vitin 2020, Kuvendi i Shqipërisë i kërkon Këshillit të Lartë Gjyqësor: Shpalljen menjëherë të të gjitha vendeve të lira në Gjykatën e Lartë dhe përmbylljen në një kohë sa më të shpejtë të procesit të plotësimit të këtyre vendeve, sipas përcaktimeve të nenit 48 të Ligjit 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar, me qëllim vënien e kësaj gjykate në funksionalitet të plotë, realizimin e kuorumeve lidhur me shqyrtimet gjyqësore, sidomos ato të njësimit të praktikave gjyqësore nga Kolegjet e Bashkuara si dhe përmbushjen e detyrave të Gjykatës së Lartë për zgjedhjen e tre anëtarëve të Gjykatës Kushtetuese”, është kërkesa e parë e Kuvendit për KLGJ.
Më tej Kuvendi kërkon përfundimin e procedurave për plotësimin e vendeve të lira në Gjykatën e Posaçme të Apelit për Korrupsionin dhe Krimin e Organizuar dhe në Gjykatën e Shkallës së Parë për Korrupsionin dhe Krimin e Organizuar.
Po ashtu Kuvendi kërkon nga KLGJ-ja përmbylljen sa më parë të punës për hartën e re gjyqësore dhe formalizimin e propozimit të përbashkët me Ministrinë e Drejtësisë për riorganizimin e rretheve gjyqësore dhe kompetencave tokësore të gjykatave. “Përmbylljen e paketës së plotë me akte nënligjore normative dhe rregullatore, sipas përcaktimeve të Ligjit 115/2016 “Për organet e qeverisjes së sistemit të drejtësisë”, të ndryshuar, dhe ligjeve të tjera që parashikojnë detyrime për nxjerrjen e akteve nënligjore nga ana e Këshillit, veçanërisht aktet që normojnë rregullat e brendshme të funksionimit të Këshillit”, thuhet në rezolutën e bërë publike nga Kuvendi.
Më tej Kuvendi kërkon zbatimin e një strategjie efektive për uljen e numrit të çështjeve civile, administrative dhe penale të mbartura, bazuar në analizën e kryer nga Këshilli pasqyruar në raportin vjetor 2019.
