Të gjithë pushtetarët e korruptuar kanë filluar të shqetësohen sepse ngritja e Strukturës së Posaçme Antikorrupsion është shumë pranë.
Pas disa muajsh punë, më në fund anëtarët e parë të Prokurorisë së Posaçme po bëhen gati njëri pas tjetrit. Dje Komisioni i Pavarur i Kualifikimit vendosi të konfirmojë në detyrë dy kandidatët e SPAK, Edvin Kondili dhe Ened Nakuçi. Dy prokurorët e Krimeve të Rënda morën vendimin pozitiv nga KPK, pas seancave dëgjimore të zhvilluara dy ditë më parë.
Për Edvin Kondilin rezultoi një seancë pa telashe sepse ishte i pastër në të tre kriteret, ndërsa për Nakuçin u gjetën probleme të vogla, por që nuk e lëkundën dot pozitën e prokurorit. Që të dy prokurorët kanë hetuar dosje të bujshme. Nakuçi ka pasur në dorë dosjen “Shullazi”, kurse Kondili ka qenë prokurori i dosjes së 613 kg kokainë të kapur në Durrës. Ky vendim i KPK iu hap rrugën Kondilit dhe Nakuçit që të bëhen pjesë e SPAK.
Me konfirmimin në detyrë të tyre, numri i kandidatëve që janë gati të marrin në dorë frenat e luftës antikorrupsion shkon në 6. Më herët Komisioni i Pavarur i Kualifikimit ka konfirmuar edhe kryetaren e Prokurorisë së Krimeve të Rënda, Donika Prela, prokurorin e Prokurorisë së Përgjithshme,
Arben Kraja dhe dy prokurorët e tjerë të Krimeve të Rënda, Dritan Prençi e Besnik Muçi. Donika Prela njihet si “gruaja e hekurt” sepse ka hetuar shumë dosje të bujshme, mes të cilave edhe atë të Adriatik Llallës. Dritan Prençi ka qenë prokuror i dosjes “Tahiri”, ndërsa Besnik Muçi kandidonte në 2017 për Prokuror të Përgjithshëm të Përkohshëm.
Arben Kraja nga ana tjetër ka hetuar kreun e PD, Lulzim Basha për aferën e Rrugës së Kombit. Pra, të gjithë kandidatët e konfirmuar në detyrë kanë eksperiencë në hetimin e dosjeve të bujshme, të cilat do të jenë në fokusin e SPAK.
Kriteri kryesor për të cilin janë vlerësuar kandidatët e SPAK edhe nga KLP është hetimi i dosjeve të nxehta të korrupsionit dhe të krimit të organizuar. Fakti që gjashtë emrat e mësipërm janë konfirmuar në detyrë dhe nuk kanë probleme nga ana profesionale, do të thotë se ata janë të aftë të hetojnë dhe ndëshkojnë çdo pushtetar të korruptuar.
Asnjë pengesë për ngritjen e SPAK
Plani i Këshillit të Lartë të Prokurorisë është që Struktura e Posaçme Antikorrupsion fillimisht të ngrihet edhe me 5 a 6 prokurorë dhe më pas të arrihet numri 15 saç e parashikon ligji pak nga pak. Që të gjashtë prokurorët e lartpërmendur nuk i pengon asgjë që të bëhen anëtarë të SPAK dhe të nisin epokën e re antikorrupsion.
Kjo do të thotë se tani nuk ka më asnjë pengesë për ngritjen e SPAK sepse 6 prokurorë e kanë kaluar vetingun me sukses dhe janë gati që t’i bashkohen strukturës më të rëndësishme në vend. Tani nuk ka më asnjë dilemë që konstituimi i Strukturës së Posaçme Antikorrupsion është çështje ditësh dhe asgjë nuk mund ta pengojë më nisjen e goditjes së korrupsionit në nivele të larta.
Nga kjo strukturë të gjithë janë të rrezikuar. SPAK ka të drejtë të hetojë ministra, deputetë, ish-zyrtarë, por edhe kryeministrin, Presidentin e Republikës, ish-kryeministrat, ish-presidentët, etj. Kushdo që është i përfshirë në afera korrupsioni, nuk do të shpëtojë dot nga SPAK. Kjo gjë i ka futur në panik politikanët e korruptuar. Pra, afrimi i ngritjes së SPAK afron edhe goditjen e peshqve të mëdhenj.
Procesi i ngritjes së Strukturës së Posaçme Antikorrupsion po monitorohet dhe asistohet edhe nga ndërkombëtarët, të cilët sipas burimeve të gazetës kanë bërë shumë presion që procesi të jetë sipas standardeve dhe anëtarë të jenë prokurorët më të aftë që kanë patur në dorë dosjet e nxehta. Ata po ashtu kanë nxitur që konstituimi i SPAK të ndodhë sa më parë. Kjo gjë duket se do të bëhet realitet brenda pak ditësh sepse terreni është gati.
Mimoza Ibra