Komiteti Teknik i Ekspertëve, zhvilloi dje një konferencë për shtyp nga ku u fol për situatën e pandemisë së Covid në Shqipëri. Sipas ekspertëve, situata është përkeqësuar në raport me javët e kaluara por po mbahet në kontroll.
Kështu drejtoresha e ISHP, Albana Fico, bëri me dije shifrat e ndryshuara të ditëve të fundit, duke nënvizuar një përkeqësim të situatës. Ndër të tjera ajo u shpreh se sa i përket gjinisë më të prekur nga ky virus janë femrat, ndërsa kërkoi nga qytetarët që të respektojnë masat. “Situata paraqitet në një nivel risku të shtuar. Incidenca 14-ditore rezulton e rritur në 301 persona për 100. 000 banorë.
Mesatarja ditore për rastet pozitive është 704 për javën që lamë pas. Raporti i vdekjeve me rastet pozitive është 2.1 për qind. Femrat të prekura kemi 52% dhe meshkuj 48%. Numri i testimeve është nga targeti 1 për 1000 banorë në javë kemi kaluar në 5.8 në 1000 banorë. Kjo situatë kërkon respektimin e masave”, tha Fico. Ndërkohë, zv. ministrja e Shëndetësisë, Mira Rakacolli ka bërë me dije se nuk ka asnjë arsye që qytetarët të shqetësohet për mungesë të kapaciteteve spitalore, pasi të gjitha janë të llogaritura mjaft mirë.
“Nuk duhet të kemi asnjë shqetësim për pakësim të kapaciteteve spitalore, janë të gjitha të kalkuluara me aq sa mund të kalkulohet. Jemi të kalkuluar që të shfrytëzojmë në maksimum burimet njerëzore dhe spitalore, nuk duhet të kemi frikë që kapacitete spitalore nuk do të mjaftojnë për të gjithë ata që kanë nevojë për t’u trajtuar me Covid. Asnjë frikë për mungesë të kapaciteteve spitalore”, tha Rakacolli. Sakaq Rakacolli u pyet edhe në lidhje me ndonjë vendim të mundshëm për mbylljen e shkollave.
Ajo u shpreh se aktualisht nuk është menduar për një mbyllje të shkollave nga monitorimi që është bërë. “Incidenca nuk është rritur prej shkollave. Në bazë të shifrave do të shikojmë se ç’do të bëjmë. I kemi monitoruar veçanërisht shkollat që nga 14 shtatori. Nuk kemi parë ndonjë ndikim të rëndësishëm në shifrat e pandemisë nga hapja e shkollave. Në shifrat aktuale, nuk diskutohet mbyllja e sistemit parauniversitar”, tha Rakacolli.
Shefi i Urgjencës Kombëtare, Skënder Brataj ka sqaruar se për shkak të rasteve të shumta koha e pritjes për qytetarët për të bërë tamponin është rritur, teksa ka listuar dhe arsyet. “Koha e pritjes për qytetarët është rritur, për disa arsye. Duke ditur që kryejmë 463 vizita, por ka dhe një procedurë ku nga këto janë 146 për COVID, ekipet duhet të vishen dhe të shkojnë drejt pacientëve dhe triazhimi bëhet mbi bazën e gjendjes së një pacienti”, tha Brataj.