Këshilli i Lartë Gjyqësor i ka dhënë një tjetër goditje të fortë presidentit Ilir Meta. Ashtu siç gazeta e deklaroi pak ditë më parë se KLGJ është në dilemë nëse i takon të vendosë për këtë çështje, kështu ka ndodhur dhe dje. Paradite u mbajt mbledhja e KLGJ ku pritej të vendosej nëse do të shkarkohej apo jo Ardian Dvorani si anëtar i Gjykatës së Lartë.
Por pas debateve dhe diskutimeve mes anëtarëve, KLGJ ka vendosur që për momentin të mos marrë një vendim, duke e shtyrë pa afat çështjen. Por e bukura është se Këshilli vendosi që të kërkojë asistencën e misioneve EURALIUS dhe OPDAT. Komisioni i Karrierës arriti në përfundimin se KLGJ nuk ka kompetencë të vendosë për ndërprerjen e mandatit të anëtarit të Gjykatës së Lartë.
Për këtë rast është kërkuar opinion nga misionet që po asistojnë reformën në drejtësi. “Në vijim të mbledhjes plenare të datës 27 prill 2020, Këshilli vazhdoi shqyrtimin e shkresës së Presidentit të Republikës lidhur me qëndrimin e mëtejshëm në detyrë të z. Ardian Dvorani si anëtar i Gjykatës së Lartë. Pas shqyrtimit të shpjegimeve të dhëna nga z. Dvorani si dhe propozimeve të disa anëtarëve të tij, Këshilli, me shumicë votash, vendosi shtyrjen e shqyrtimit të kësaj çështjeje.
Kjo shtyrje u bë me qëllim që të njohë z. Dvoranin me vendimet dhe relacionet përkatëse të Këshillit për hapjen e vendeve vakante në Gjykatën e Lartë, korrespondencën e institucionit të KLGJ-së, me Presidentin e Republikës, për dekretimin e anëtarëve të rinj në të, si dhe marrjen e një opinioni ligjor nga misionet partnere që asistojnë Këshillin”, thuhet në njoftimin e KLGJ. Vendimi i KLGJ për të futur në lojë misionet e SHBA dhe BE është një goditje për kreun e shtetit, i cili po këmbëngul që Dvorani të largohet para se të vendoset për emërimin e anëtarëve të tjerë në Gjykatën Kushtetuese. Shumë shpejt KED do të plotësojë 3 vakanca, dy prej të cilave i takojnë presidentit dhe këtu fle lepuri. Por KLGJ duket se nuk do të shprehet edhe për disa javë duke e lënë në detyrë Dvoranin. Por jo vetëm kaq. Duhet theksuar se misioni EURALIUS, është armiku i presidentit./Sot/Nga Kliti Topalli