Kroacia ka dhënë sërish një provë të fortë në luftën kundër korrupsionit. Në Shqipëri reforma në drejtësi dhe veçanërisht Prokuroria e Posaçme u ngrit sipas modelit kroat dhe sinjalet janë shtuar ndjeshëm se dhe në vendin tonë do ndiqet i njëjti shembull sa u takon hetimeve në nivele të larta.
Dje Kroacia ka dënuar me 8 vite burg ish-kryeministrin Ivo Sanader, duke dhënë një sinjal dhe për pushtetarët shqiptarë. Sanader, është dënuar me tetë vjet burgim, pasi është gjetur fajtor për krijimin e fondeve për partinë e tij konservatore HDZ, duke marrë para nga kompanitë publike përmes një agjencie të marketingut. Sanader ka hedhur poshtë të gjitha akuzat për korrupsion dhe pritet që ta apelojë këtë vendim të gjykatës.
Ky ishte një rigjykim i një rasti të mëhershëm, ku Sanader ishte dënuar me nëntë vjet burgim më 2013, por vendimi ishte anuluar nga Gjykata Supreme, për shkak se ishin gjetur shkelje procedurale. Sanader, 67 vjeç, ka qenë kryeministër i Kroacisë më 2003 deri më 2009, kur dhe u largua nga ky post pa dhënë asnjë shpjegim. Në rigjykim, gjykatësi tha se Sanader kishte organizuar një grup të njerëzve për të kryer aktivitete kriminale dhe për të mbuluar marrëveshjet joligjore financiare, ka raportuar media shtetërore kroate.
Partia e tij, HDZ, që aktualisht është në pushtet, është gjobitur me afro 550,000 dollarë dhe është urdhëruar nga gjykata që të kthejë 2,1 milionë dollarë fonde, të përfituara në mënyrë të paligjshme. Sanader po ashtu po vuan një dënim tjetër, pasi më 2008 ishte dënuar për ryshfet, pasi kishte ndërmjetësuar që një ndërtesë që i përkiste një bashkëpartiaku të tij, t’i shitej një ministrie, me çmim më të lartë se çmimi i tregut.
Ai po ashtu është dënuar për pranim të ryshfetit nga kompania hungareze e naftës MOL më 2008, në këmbim që ta lejojë këtë kompani të bëhej aksionare kryesore e kompanisë kroate të energjisë INA. Në të dyja rastet për ryshfet, Sanader ka hedhur poshtë të gjitha akuzat dhe për këto raste i është drejtuar Gjykatës së Apelit, raporton “REL”.
Prokurorja kroate në SPAK
Pak ditë më parë SPAK pati një bisedë me DNA në Itali, ku u fol për të bashkëpunuar në luftën kundër krimit të organizuar. Por sipas informacioneve pritet që bashkëpunime të tilla të ketë dhe me USKOK në Kroaci (simotra e SPAK) dhe me prokurorinë rumune.
Në momentin që nisi ngritja e SPAK, BE solli në Tiranë Tamara Laptos, ish-shefja e USKOK. Ajo do qëndrojë 2 vite në Tiranë dhe do asistojë në funksionimin e SPAK dhe BKH. Zonja Lapos është një ndër prokuroret që hetoi ish-kryeministrin Ivo Sanader dhe falë hetimeve të zhvilluara prej saj, ai u dënua. Në atë kohë USKOK drejtohej nga Dinko Cvitan edhe Laptos ishte prokure e thjeshtë.
Por pas largimit të Cvitan, ajo mori drejtimin e prokurorisë dhe frerët e luftës ndaj korrupsionit dhe krimit të organizuar. Laptos është sjellë në Tiranë nga misioni EURALIUS, në kuadër të masave që po merren për ngritjen e SPAK. Ajo do të jetë eksperte e EURALIUS-it për dy vite në Shqipëri dhe do asistojë në trajnimet që do zhvillohet në luftën ndaj korrupsionit. Pra ajo do mbikëqyrë SPAK dhe goditjet që do bëhen ndaj pushtetarëve.