Thellohen përplasjet mes presidentit Ilir Meta dhe kryetarit të Kuvendit, Gramoz Ruçi. Ky i fundit përmes një shkrese i kërkoi pak ditë më parë kreut të shtetit që të propozojë një emër për kreun e Kontrollit të Lartë të Shtetit.
Ndërkohë që dje presidenti Meta është vënë në lëvizje, ndërsa ka propozuar pedagogun Arben Shehu për drejtimin e kreut të KLSH, jetëshkrimin e të cilit ia ka vënë në dispozicion Parlamentit. Në argumentin e paraqitur, zoti Meta shprehet se kandidatura e Shehut i plotëson të gjitha kriteret e kërkuara nga Kushtetuta e Shqipërisë ndaj dhe kërkohet vota e deputetëve.
“Dr. Arben Shehu plotëson të gjitha kushtet dhe kriteret ligjore për t’u emëruar në këtë pozicion, si dhe është një kandidaturë me eksperiencë të gjatë në fushën e së drejtës dhe pedagogjisë. Gjatë eksperiencës mbi 16-vjeçare në jetën akademike, Dr. Arben Shehu është një ndër njohësit më të mirë të drejtësisë penale.
Z.Shehu është diplomuar gjithashtu edhe në fushën e ekonomisë dega “Administrim Biznesi”, me një eksperiencë të gjatë akademike, kërkime dhe shkrime shkencore, por edhe përvojë të spikatur në zbatimin e ligjit, si ushtrues aktiv i profesionit të avokatisë”, thuhet në argumentimin e Presidencës.
Kriteri ekonomik
Nëse kthehemi pas, 2 emrat e parë që propozoi Meta u s’kualifikuan për shkak se nuk kishin përvojë në fushën ekonomike. Neni 20/b e ka si kusht kryesor përvojën profesionale në fushën ekonomike. Zoti Shehu vërtet ka mbaruar një degë për administrim biznesi në 2018, por në CV e tij në asnjë moment nuk tregohet një përvojë e tij si ekonomist. Ai ka bërë përfaqësimin e disa kompanive vetëm si avokat. Mbetet të shihet se si do veprojë Komisioni i Ekonomisë, por duke marrë shembull se si u s’kualifikuan Bahri Shaqiri dhe Vitore Tusha, edhe në këtë rast kriteri ekonomik do jetë vendimtar.
Meta në alarm për ndryshimet në ligj
Më tej në letrën drejtuar Kuvendit, presidenti Ilir Meta shprehet se refuzimi i tre kandidaturave të para ka qenë sipas tij, një presion politik me qëllim që të vendoste kandidaturën që mazhoranca kërkonte. Madje, presidenti Meta akuzoi mazhorancën se po kap institucionet e pavarura, sikundër është Kontrolli i Lartë i Shtetit, ndërsa vuri në dukje faktin që shumica qeverisëse është duke hartuar një projektligj në mënyrë që të vendosë në kontroll këtë institucion përmes emërimit të një nënkryetari.
“Presidenti i Republikës deri më tani është vënë para faktit të kryer të rrëzimit të propozimeve për tre kandidatura radhazi, pavarësisht se të tre këto kandidatura përmbushnin kriteret ligjore dhe gëzonin përvojë të gjerë profesionale. Është për t’u evidentuar se letra e Kryetarit të Kuvendit është shoqëruar me një fushatë publiciteti në media nga Kuvendi mbi nismën ligjore që ky i fundit do të ndërmarrë për miratimin e një projektligji, përmes të cilit do të bëhet i mundur emërimi me ligj i një zëvendëskryetari të KLSH-së, duke e justifikuar këtë si zhbllokim të situatës.
Është e qartë se e gjithë kjo veprimtari, e shoqëruar me këtë fushatë publiciteti, ka për qëllim ushtrimin e presionit politik ndaj Presidentit të Republikës me qëllim që të propozojë për Kryetar të Kontrollit të Lartë të Shtetit një kandidaturë nga ato që kërkon prej kohësh mazhoranca”, argumenton ai. Ndërkohë, teksa akuzon mazhorancën se po tenton të kapë institucionin e KLSH, Meta nënvizoi si argument faktin se i janë rrëzuar pa të drejtë 3 emrat e parë të propozuar nga ai për kreun e këtij institucioni, si Vitore Tusha, \
Bahri Shaqiri dhe Petraq Milo. “Ndaj çdo veprimtari e mëtejshme nën këtë drejtim me paraqitje nismash legjislative, me qëllim kapjen e institucioneve të pavarura apo ushtrimin e presionit politik ndaj institucioneve të tjera, nuk bën gjë tjetër veçse provon faktin që tre kandidaturat e mëparshme të propozuara nga Presidenti i Republikës, janë rrëzuar pa të drejtë nga Kuvendi, me qëllim që të propozohet një kandidaturë që gëzon mbështetjen e mazhorancës në mënyrë që mazhoranca të kontrollojë po veten e saj”, argumenton presidenti Ilir Meta.