Ilir Meta i ka shpallur sërish luftë mazhorancës socialiste. Komisioni për Ekonominë dhe Financat ka rrëzuar tre dekretet e presidentit Meta, sikundër është ai për heqjen e TVSH-së së jahteve, të koncesionit në Porto-Romano, Durrës dhe për shërbimet e pagesave. Por procedura e ndjekur nga Komisioni i Ekonomisë, duket se ka alarmuar tej mase kreun e shtetit, i cili ka shpërthyer ditën e djeshme në sulme dhe akuza në adresë të deputetëve.
Përmes një deklarate të shpërndarë për mediat, zoti Meta shprehet se një veprim i tillë, pra kthimi i dekreteve të tij është bërë e përsëritur dhe në shkelje flagrante me ligjin, teksa e quan procedurën e ndjekur nga mazhoranca si një “korrupsion legjislativ”. “Këto veprime kanë për synim keqinformimin e publikut, fshehjen e anti-kushtetutshmërisë së këtyre ligjeve, cenimin e interesit publik, si dhe fshehjen e kostove që do të prodhojnë këto ligje, kosto që do të duhet t`i paguajnë të gjithë qytetarët shqiptarë në të ardhmen.
Procesi ligjbërës po shpërdorohet haptazi, në mënyrën më flagrante të mundshme, ku tashmë nuk po shkelet ligji për të kryer favore, por po bëhen ligje të posaçme për t`i realizuar ato. Në gjuhën juridike, kjo do të thotë “korrupsion legjislativ”, që është akti më i rëndë i shpërdorimit të pushtetit publik”, deklaroi ai.
SPAK të hetojë deputetët
Më tej, presidenti Ilir Meta i ka bërë thirrje SPAK-ut që të nisë hetimet për të gjitha procedurat e propozimit dhe shqyrtimit të këtyre ligjeve për të vënë përpara përgjegjësisë autorët, të cilët përmes ligjit sipas tij, duan të përmbushin qëllimet e tyre favorizuese klienteliste.
Madje, kreu i shtetit theksoi se ka ardhur koha që SPAK të nisë hetimet për anëtarët e Komisionit të Ekonomisë. “Ligji nuk mund të bëhet për një individ, as për dy. Ligji i adresohet gjithë shoqërisë dhe të gjithë duhet të jenë të barabartë përpara tij. Nëse ligji përdoret për të krijuar ombrellë mbrojtëse nga përgjegjësia penale e vendimmarrjeve në fusha sensitive, atëherë Kuvendi nuk po kujdeset më për të mirën publike, por për interesa të një grupi njerëzish të lidhur drejtpërdrejt me shumicën parlamentare.
Procesi ligjbërës dhe interesat klienteliste nuk mund të fusin në qorrsokak procesin e integrimit europian. I bëjmë thirrje Prokurorisë së Posaçme Antikorrupsion (SPAK) të nisë hetimet për të gjitha procedurat e propozimit dhe shqyrtimit të këtyre ligjeve për të vënë përpara përgjegjësisë autorët, të cilët përmes ligjit duan të përmbushin qëllimet e tyre favorizuese klienteliste”, u shpreh ai.
Meta: Kuvendi “injoroi” Presidencën
Por në kushtet kur Komisioni i Ekonomisë dhe Financave nuk i mori në konsideratë vërejtjet e Presidentit Ilir Meta për 3 ligje që kanë të bëjnë me taksa dhe investime, duke i kaluar ato pa ndryshime, kreu i shtetit kritikoi Kuvendin për faktin se ky i fundit e ka injoruar atë.
Sipas Metës, Komisioni i Ekonomisë nuk ka ftuar asnjë përfaqësues të Presidentit në seancë dëgjimore dhe nuk kanë dëgjuar asnjë argument para së të merrnin këtë vendim. “Komisioni për Ekonominë dhe Financat nuk ka njoftuar Institucionin e Presidentit të Republikës për të qenë prezent në shqyrtimin e dekreteve, përmes përfaqësuesve të tij.
Ky veprim i Komisionit të Ekonomisë dhe Financave është i përsëritur, sidomos kur shqyrtohen dekrete për kthimin e ligjeve që denoncojnë antikushtetushmërinë e tyre, cenimin e interesit publik e kombëtar, si dhe cenimin e financave të shtetit me ligje speciale me efekt favorizues për një grup të caktuar individësh. Ky veprim i Komisionit të Ekonomisë dhe Financave është i papranueshëm dhe në kundërshtim me parimet kushtetuese të transparencës në procesin legjislativ.
Qëllimisht, kur shqyrtohen Dekretet e Presidentit të Republikës, ftohen për të qenë të pranishëm vetëm përfaqësues të Qeverisë, që bëjnë reklamimin e radhës së ligjit, duke fshehur të metat e rënda që paraqesin këto akte të reja ligjore”, nënvizoi presidenti Ilir Meta./Rigels Seliman