Organizata LGBTI, së bashku me disa organizata të grave, grupe liberale dhe promovues të të drejtave të gjinive alternative, i kanë dalë në mbrojtje kreut të grupit parlamentar të Partisë Demokratike, Gazment Bardhi, pas përplasjes së fundit me deputeten socialiste Zegjine Çaushi.
Në një letër drejtuar Byrosë së Kuvendit, këto organizata kërkojnë marrjen e një mase disiplinore ndaj deputetes Çaushi, me argumentin se ajo ka përdorur gjuhë fyese dhe denigruese ndaj Bardhit gjatë një seance parlamentare.
Sipas tyre, sjellja e deputetes përbën shkelje të etikës parlamentare dhe nuk mund të trajtohet më me masa të lehta.
Në letrën e tyre thuhet se, “duke pasur parasysh se kemi të bëjmë me një sjellje të përsëritur jo etike parlamentare nga deputetja Zegjine Çaushi, vlerësojmë se masa ‘Tërheqje e vëmendjes’ nuk përbën më një reagim proporcional në raport me natyrën dhe frekuencën e shkeljes”.
Organizatat theksojnë se, në zbatim të parimit të proporcionalitetit dhe të përshkallëzimit të masave disiplinore të parashikuara në Rregulloren e Kuvendit, duhet të merret masa disiplinore “Vërejtje”.
Debati mes palëve nisi në seancën plenare të 19 shkurtit, kur deputetja socialiste iu drejtua Bardhit duke i kujtuar rezultatin e dobët që Partia Demokratike mori në Qarkun Fier në zgjedhjet parlamentare të 11 majit, ku ai ishte Drejtues Politik.
Gjatë fjalës së saj, Çaushi përdori edhe një shprehje ironike ndaj Bardhit, duke thënë: “Ti je një njeri që vetëm për t’u përdredhur erdhe në Fier, me atë trupin tënd si purtekë domatesh”.
Kjo deklaratë ka nxitur reagimin e fortë të organizatës LGBTI që kërkon nga institucionet parlamentare të reagojnë për mbrojtjen e figurës së Gazment Bardhit.
Përplasjet mes Bardhit dhe Çaushit kanë nisur gjatë fushatës për zgjedhjet parlamentare të 11 majit, kur retorika u ashpërsua sidomos në qarkun Fier, ku Bardhi ishte drejtues politik i opozitës.
Pas rezultatit shkatërues për PD, me vetëm 4 mandate të fituara, debatet vijuan edhe në sallën e Kuvendit, ku palët kanë shkëmbyer akuza dhe replika të forta. Në disa seanca plenare, përplasja ka kaluar edhe në tone personale dhe ironike, duke nxitur tashmë edhe reagimin e organizatës LGBTI dhe 16 organizatave të tjera në mbrojtje të Bardhit.
