Rindizet lufta për Gjykatën Kushtetuese. Një vit më parë në të njëjtën periudhë kohore pati përplasje të forta mes KED, Presidencës dhe Kuvendit, ndërsa sivjet nuk ka sherre, por e gjitha po bëhet në prapaskenë.
Duke shfrytëzuar presionin ndërkombëtar për të bërë Kushtetuesen funksionale brenda vitit, KED përveç kualifikimit të kandidatëve në shkelje të ligjit, ka thyer çdo rekord dhe sa i takon verifikimit të tyre. Dje KED u mblodh për të shqyrtuar dy kandidatët e kthyer në garë nga Gjykata Kushtetuese për vakancën e shpallur pas shkarkimit të Besnik Muçit.
KED ka eliminuar Zhaklin Peton dhe Eugen Papandilen. Në garë kanë mbetur Sonila Bejtja dhe Altin Binaj. Këta dy emra pritet t’i shkojnë Presidentit për vakancën e datës 22.11.2019. Edhe pse ligji e specifikon se duhen 3 kandidatë, sipas burimeve po shqyrtohet mundësia të shkojnë vetëm 2 emra. Me gjasë Meta do zgjedhë zonjë Bejtja, e cila publikisht ka folur pro tij.
Por elementi tjetër është sa i takon vakancave të datave 24.09.2020 të shpallura nga Kuvendi e Presidenca. Emrat e kandidatëve kanë shkuar në KED rreth datës 16 tetor, ndërsa javën që lamë pas u përgatitën raportet për disa prej tyre duke kryer verifikime në kohë rekord. Ndërkohë vitet e shkuara duheshin mbi 6 muaj. Dje KED vendosi lejimin e kandidimit të kandidatëve për gjyqtarë në Gjykatën Kushtetuese:
Altin Binaj, për vendin vakant shpallur nga Presidenti i Republikës në datën 07.02.2018 dhe rishpallur në datat 27.09.2019 dhe 24.09.2020; Altin Binaj, për vendin vakant shpallur nga Kuvendi i Shqipërisë në datën 28.08.2018 dhe rishpallur në datat 21.08.2019 dhe 24.09.2020; Aleksandër Toma, për vendin vakant shpallur nga Presidenti i Republikës në datën 07.02.2018 dhe rishpallur në datat 27.09.2019 dhe 24.09.2020.
Loja në prapaskenë
Ajo që bie në sy është se me vendimmarrjet e KED do kemi së pari sërish përplasje mes Kuvendit dhe Presidencës. Kandidati Altin Binaj, është kualifikuar për 3 vakanca, çka do sjellë patjetër konflikt nëse nuk ka koordinim. Elementi i dytë është se bie në sy fakti që KED po e mbyll në kohë rekord procesin, teksa në 1 janar këta anëtarë mund të mos jenë më aty.
Meta bëri luftë të fortë që Vitore Tusha të ishte në krye të KED dhe ia doli. Por në 5 dhjetor do riformatohet KED dhe drejtimin do e marrë anëtari i Gjykatës Kushtetuese. Nga ana tjetër Tusha mund të mos jetë edhe fare anëtare nëse nuk i bie shorti. Pra ajo që bie në sy, është se KED po nxiton të plotësojë të dyja vakancat e Presidencës, ndërkohë sa u takon vakancave të Parlamentit kjo është shumë e vështirë.
Ka dhe disa emra të tjerë që janë në shqyrtim dhe për ta do vendoset në ditët në vijim. Nëse vërtet do ndiqet skenari që flitet nën zë se mund të anashkalohet ligji për faktin se duhen dërguar 3 emra, (do të dërgohen 2), atëherë kjo vulos faktin që njerëzit e Metës në KED po bëjnë çdo gjë që të besuarit e kreut të shtetit të futen në Kushtetuese para formatimit të Këshillit. Në media është denoncuar dhe fakti që në rastin e kandidates Bejtja KED ka bërë një anashkalim. Zonja, gruaja e analistit të kazanëve të PD_së Andi Bejtja ka qenë notere dhe ligji nuk e njeh përvojën si noterë. Por KED e anashkaloi duke e futur te përvoja e përgjithshme 15-vjeçare.